Milani “tronditet” në start, Cremonese bën surprizën e madhe

2025-08-23 23:58:00, Sport CNA

Milani “tronditet” në start, Cremonese bën surprizën

Java e parë e Serisë A solli menjëherë surpriza të mëdha, ku vëmendja kryesore ishte tek humbja e Milanit në “San Siro”. Kuqezinjtë u mposhtën 2-1 nga Cremonese, skuadër e sapo ngjitur në elitë, në një ndeshje që shënoi disfatën e parë historike të Milanit në shtëpi ndaj kësaj skuadre në kampionatin italian.

Pas një sezoni zhgënjyes ku përfunduan në vendin e tetë, te Milani kishte pritshmëri të larta për të nisur mbarë edicionin e ri nën drejtimin e trajnerit Alegri. Megjithatë, sfida ndaj Kremonezes nuk u zhvillua sipas parashikimeve. Në minutën e 16-të, Giménez e dërgoi topin në rrjetë, por goli u anulua për pozicion jashtë loje. Vetëm pak minuta më pas, miqtë kaluan në avantazh. Alesio Zerbin krosoi nga e djathta dhe blerja e re, Federiko Baskiroto, shënoi me kokë.

Milani u duk i pafuqishëm për të reaguar, por barazoi rezultatin në fundin e pjesës së parë. Estupinjam harkoi saktë në zonë dhe Pavlovi? goditi me kokë duke e dërguar topin në rrjetë. Pavarësisht protestave të lojtarëve të miqve për një faull gjatë aksionit, goli u pranua dhe skuadrat shkuan në pushim në barazim 1-1.

Në fillim të pjesës së dytë, Milani tentoi të përmbyste rezultatin. Luka Modriç, në debutimin e tij në Serinë A, Pulisiç dhe Fofana rrezikuan portën kundërshtare, por portieri Audero u tregua i saktë. Me kalimin e minutave, presioni i kuqezinjve ra dhe Cremonese goditi sërish. Në minutën e 60-të, Bonazoli, ish-sulmues i Interit, shënoi një gol spektakolar me roveshatë, duke mos i lënë asnjë mundësi portierit Mike Maignan.

Në gjysmën e dytë të lojës, Milani dominoi posedimin dhe qëndroi shumicën e kohës në gjysmëfushën e miqve, por pa krijuar rrezik të madh. Audero pati pak punë, ndërsa mbrojtja mike rezistoi deri në fund, duke marrë një fitore historike.

Ky rezultat vendos presion të menjëhershëm mbi skuadrën e Alegrit, që synon rikthimin te rezultatet pozitive. Nga ana tjetër, trajneri Davide Nikola e sheh këtë sukses si një bazë të fortë për të grumbulluar pikë të vlefshme në javët e para.