web counter
LEXO PA REKLAMA!

SHKARKO APP

App Store
Google Play

Çfarë pritet nga Klodjan Braho?

2025-12-14 16:01:00, Editorial CNA

Çfarë pritet nga Klodjan Braho?

Klodjan Braho mori zyrtarisht detyrën e kreut të SPAK-ut, me zgjedhjen e tij nga KLP-ja, më datë 11 dhjetor, në një votim ku mori shtatë vota.

Më shumë sesa ka marrë tre vite më parë Altin Dumani, njeriu që e drejtoi SPAK-un me “dorë të hekurt”, duke e kaluar në një tjetër nivel, ashtu sikundër e tha edhe Kryeministri Rama në daljen e tij në podcastin 'Flasim'.

Rama ka qenë mjaft kritik ndaj SPAK-ut, sidomos në rastin kur është arrestuar Erion Veliaj.

Ka sulmuar prokurorët, ka sulmuar institucionin. Ndërsa sot e ka vlerësuar Altin Dumanin.

Kujtojmë se Altin Dumani është një nga prokurorët e hetimit të dosjes së Erion Veliajt, kryebashkiakut të Tiranës, i cili ndodhet pas hekurave në Burgun e Durrësit.

Rama në fakt ka pasur qëndrime të dyzuara, pavarësisht mbështetjes së tij sistematike për Reformën në Drejtësi. Por, me sa duket, tek Altin Dumani i “ngeci sharra në gozhdë”. Dhe pikërisht kjo është ajo që kërkohet nga Klodjan Braho si kryetari i SPAK-ut, që politikanëve dhe krerëve më të lartë të qeverisë t'iu “ngelet sharra në gozhdë” kur vjen puna për të folur për SPAK-un. Nuk mund të jetë ky institucion ‘vasal’ i pushtetit, “vasal” i partive, “vasal” i qeverive, “vasal” i ministrave. Duhet të jetë muri ndarës që i thotë qeverisë, ministrave, pushtetit, Kryeministrit dhe kujtdo tjetër: 'Ndalu Bek, se ka hendek!'. Ndal korrupsionit! Shqipëria ka institucione që ju luftojnë, ju pengojnë, ju vëzhgojnë në zbatim të ligjit, , në mbrojtje të interesave të qytetarëve.

Ajo që kërkohet nga Klodjan Braho është që të ketë një standard. Ta ruajë dhe ta përmirësojë standardin ‘Altin Dumani’.

A mund ta ruajë? Kjo është e lehtë. A mund ta përmirësojë? Kjo është e vështirë. Por të paktën njërën duhet ta bëjë.

Në SPAK nuk mund të ketë dy standarde. Duhet të ketë një dhe vetëm një: ‘Standardin Altin Dumani’. Atë të përballjes dhe qëndrimit me fakte me prova dhe me gjakftohtësi dhe rezitencë përballëkrimit dhe politikës.

Në SPAK ka dhe prokurorë që nuk i janë të këtij standardi. Mjafton të përmendim çështjen e inceneratorëve, e cila është një njollë e zezë e këtij institucioni. Hetimi për inceneratorin e Tiranës që nuk ekziston.

Ka dhe të tjera. Por kjo është më kryesorja sepse ngadalësia, hetimi në mënyrë joprofesionale e ka bërë që shumica e personave përgjegjës të mos jenë para ligjit, në bankën e të akuzuarve me pranga, por të jetojnë në vendet e Europës dhe të botës si pashallarë, pa folur për dhjetëra e mijëra miliona euro të humbura nga taksat e shqiptarëve. Kjo dhe për faj të një prokurori të paaftë, që nuk është i standardit Dumani.

Kjo është ajo që kërkohet nga Klodjan Braho, asgjë më shumë sesa kaq. Të ruajë standardin ‘Dumani’ dhe të kërkojë që ai të përmirësohet. Qoftë edhe në të drejtat e njeriut siç kërkojnë shumë juristë, apo edhe në standardet e hetimit sipas niveleve të Bashkimit Europian.

Që SPAK-u me Altin Dumanin ka kaluar në një nivel tjetër, kjo tashmë është e provuar. Pas gjumit letargjik të Arben Krajës, erdhi energjia dhe forca e Altin Dumanit.

Tani Klodjan Braho duhet të përdorë profesionalizmin, durimin dhe mençurinë për ta çuar më tej SPAK-un si institucion dhe për të treguar se nuk ka kthim pas. Dhe kjo është e vetmja rrugë në mbrojtje të qytetarëve shqiptarë, jo vetëm për të akuzuar zyrtarët e shtetit, por për të ndërgjegjësuar administratën, zyrtarët, politikën, shtetin, se zgjidhja dhe ardhmja nuk janë korrupsioni.

‘Do të përballen me akuzat në rast se fusin duart në xhepat e qytetarëve. Zbatoni ligjin dhe vetëm kaq’ dhe kjo duhet të jetë kërkesa e pandashme e SPAK-ut i cili duhet të qëndrojë atje përballë, me Klodjan Brahon në krye apo me këdo tjetër. Mjafton të ketë vullnet, forcë dhe drejtësi, që fillon nga ligji dhe mbaron aty ku mbaron ligji.

Ligji dhe vetëm ligji është ai që duhet zbatuar dhe standardet e institucionit të vendosura nga Altin Dumani duhet të ruhen me forcë nga prokurorët që duhet të jenë garantë të këtij standardi që i ka dhënë Shqipërisë një hap tjetër në Bashkimin Europian, një hap tjetër në rrugën e saj të integrimit dhe këtë e ka bërë edhe prej vizionit që pati Altin Dumani në krye të SPAK-ut.

Mjafton të bëhet krahasimi me paraardhësin e tij dhe disa prokurorë të tjerë të SPAK-ut, të cilët disa prej tyre ndoshta nuk e meritojnë fare të jenë në atë institucion, për të kuptuar diferencën. Klodian Braho duhet të jetë diferenca. /CNA





14:16 Editorial Ditmir Bushati

POST PAX AMERICANA

The new US National Security Strategy has received greater...

Lajmet e fundit nga