Vrasja e gjyqtarit Kalaja/ Dhoma e Avokatisë bojkoton proceset gjyqësore për 2 ditë

2025-10-07 15:14:00, Aktualitet CNA

Vrasja e gjyqtarit Kalaja/ Dhoma e Avokatisë bojkoton proceset

Dhoma e Avokatisë së Shqipërisë, përmes komitetit të saj drejtues, ka dalë në një vendim pas vrasjes së gjyqtarit Astrit Kalaja.

Nëpërmjet një njoftimi, Dhoma e Avokatisë bën me dije se duke marrë shkas nga ngjarja e paprecedentë, do të bojkotojë të gjitha proceset hetimore dhe ato gjyqësore, për çështjet penale, civile dhe administrative, në të gjitha nivelet e gjykimit, për datat 9 dhe 10 tetor 2025.

VENDIM-KOMITETI DREJTUES I DHOMËS SË AVOKATISË SË SHQIPËRISË

Komiteti Drejtues i Dhomës së Avokatisë së Shqipërisë përcjell me shumë shqetësim ngjarjen lidhur me vrasjen e gjyqtarit të Gjykatës së Apelit të Juridiksionit të Përgjithshëm, z. Astrit Kalaja, si ngjarjen më të rëndë dhe të paprecedentë të ndodhur ndonjëherë në sistemin e drejtësisë.

Komiteti Drejtues i Dhomës së Avokatisë së Shqipërisë vendosi njëzëri që të bojkotojë të gjitha proceset hetimore dhe ato gjyqësore, për çështjet penale, civile dhe administrative, në të gjitha nivelet e gjykimit, për datat 9 dhe 10 tetor 2025./CNA