Skemat mbështetëse në investime/ AZHBR, apel fermerëve në Shkodër për të aplikuar

6 Gusht 2025, 14:28, Ekonomi CNA

Skemat mbështetëse në investime/ AZHBR, apel fermerëve

Agjencia për Zhvillimin Bujqësor dhe Rural ka zhvilluar një takim me fermerët e Qarkut Shkodër në kuadër të informimit mbi thirrjen e re për skemat kombëtare të investimeve.

Zëvendësministri i Bujqësisë vuri theksin tek informimi i fermerëve përpara se ata të aplikojnë në mënyrë që të jenë përfitues të sigurtë të këtyre skemave.

“Po zhvillojmë një tur në të gjithë Shqipërinë për skemën kombëtare të investimeve në bujqësi. Kërkohet një angazhim i madh edhe i pushtetit vendor në mënyrë që fermerët të dinë si t'i qasen skemës së përfitimeve. Skema e investimeve është 20 milionë dollarë. Ne kemi edhe një mbështetje tjetër që është garancia sovrane. Kur nuk ke mundësi për të vënë kolateral dhe për të marrë kredi, 70% e vendos shteti dhe kredia nga bankat do të jepet me 2%. Investimet janë të rëndësishme për zhvillimin e bujqësisë dhe blegtorisë, por edhe të agrikulturës dhe peshkimit. Drejtohuni institucioneve dhe mos u vendosni në vështirësi vetë se mund të bëni ndonjë gabim gjatë aplikimit”, tha zëvendësministri i Bujqësisë, Arjan Jaupllari.

Nënkryetari i Bashksië Shkodër, Alban Preka, u bëri thirrje fermerëve që të aplikojnë masivisht teksa tha se pikat e informimit do të jenë të hapura gjatë gjithë kohës.

“Kjo mbështetje, është një mundësi e shkëlqyer që fermerët të rrisin kapacitetet e tyre. Dy aktet e kombinuara për mundësinë e kreditimit të butë bënë të mundur që çdo fermer të rrisë kapacitetet dhe fermerët në përgjithësi të zhvillohen. Ftoj të gjithë fermerët që të shfrytëzojnë këtë mundësi si dhe mbështetja e institucioneve ka për të qenë sa më e madhe dhe të ndihmojmë aplikuesit për një dokumentacion sa më të saktë”, tha Preka.

9 masa mbështetëse për sektorin e bujqësisë janë programuar këtë vit për fermerët. Të gjithë fermerët, agropërpunuesit, dhe sipërmarrësit në fushën e agroturizmit, mund të aplikojnë deri në datë 30 shtator 2025 për të përfituar një paketë financimi të integruar, që përfshin kreditë e buta, si dhe 50% grante./ CNA