Kthehen investitorët “tradicionalë”/ Për tremujorin e parë kryesojnë Turqia dhe Italia

26 Qershor 2024, 10:20, Ekonomi CNA

Kthehen investitorët “tradicionalë”/ Për tremujorin e

Foto ilustruese, marrë nga Google

Turqia ishte investitori kryesor i huaj në Shqipëri për tremujorin e parë të këtij viti. Sipas të dhënave nga Banka e Shqipërisë, investimet turke prekën vlerën e 69 milionë eurove, me një rritje prej 116% krahasuar me të njëjtën periudhë të një viti më parë.

Investimet turke i janë rikthyer rritjes qysh vitin e kaluar, pasi ranë në vitin 2022, kryesisht si rezultat i shitjes së Albtelecom nga grupi turk Çalik tek ai hungarez 4iG.

Stoku i investimeve turke në fund të tremujorit të parë ka arritur në 1.06 miliardë euro, në rritje me 27% krahasuar me një vit më parë. Pas largimit nga sektori i telekomunikacioneve, ndërmarrjet turke vazhdojnë të kenë një rol të rëndësishëm në sektorin financiar, atë energjetik, në industrinë nxjerrëse, etj.

Një tjetër investitor historik në Shqipëri, Italia, u rendit i dyti për tremujorin e parë të këtij viti, me një fluks investimesh të reja prej 41 milionë eurosh. Fluksi i investimeve italiane pësoi një rënie të lehtë me 4.7% krahasuar me tremujorin e parë të vitit të kaluar. Italia ngelet një nga investitorët e huaj më të mëdhenj në Shqipëri. Stoku i investimeve italiane ka arritur në 1.53 miliardë euro, 26% më shumë krahasuar me të njëjtën periudhë të një viti më parë. Investimet italiane janë të shpërndara nga këndvështrimi sektorial, por orientohen sidomos në aktivitetet e shërbimeve.

Austria u rendit e treta në listën e investitorëve të huaj sipas flukseve të reja investuese, për një shumë totale prej 34 milionë eurosh në tremujorin e parë të vitit. Investimet austriake janë rritur me 143% krahasuar me një vit më parë. Investimet austriake në Shqipëri janë të përqendruara sidomos në tregun e sigurimeve, në sektorin energjetik, në shërbimet e hotelerisë dhe në sektorin e ndërtimit, me kompaninë. Stoku i investimeve austriake arriti në 839 milionë euro, në rritje me 20% krahasuar me të njëjtën periudhë të një viti më parë.

Shteti që ka dominuar investimet e huaja direkte në vitet e fundit, Holanda, në tremujorin e parë të renditjes zbriti në vendin e katërt për nga vlera e investimeve të reja, me 25 milionë euro. Vlera e investimeve holandeze ra me 58% krahasuar me tremujorin e parë të vitit të kaluar. Megjithatë, për nga stoku i akumuluar i investimeve të deritanishme, Holanda ngelet investitori i huaj më i madh në Shqipëri, me një vlerë prej 2.28 miliardë eurosh dhe më një rritje vjetore prej 24%.

Burimi: BSH

Në fakt, investitorët e mirëfilltë holandezë në Shqipëri janë të paktë. Më i rëndësishmi mes tyre është kompania Shell, që vlerësohet se në vitet e fundit mund të ketë rritur investimet e lidhura me shpimet në zonën e Shpiragut. Megjithatë, përtej një roli në rritje të Shell, kryesimi i investimeve holandeze në vitet e fundit lidhet kryesisht me faktin se Holanda është një nga vendet e preferuara në Evropë për të regjistruar kompani holding, me qëllim kontrollin e investimeve ndërkombëtare të grupeve të ndryshme të biznesit. Holanda preferohet për regjistrimin e kompanive offshore, sepse legjislacioni i atjeshëm garanton një shkallë të lartë konfidencialiteti lidhur me pronësinë e aksioneve. Gjithashtu, Holanda është një juridiksion i preferuar për regjistrimin e shoqërive holding, sepse ajo ka një rrjet të gjerë të marrëveshjeve me vende të tjera të botës për shmangien e tatimit të dyfishtë.

Kosova vazhdon të shtojë investimet në Shqipëri dhe për tremujorin e parë flukset e reja të investimit prekën vlerën e 20 milionë eurove, me një rritje prej 82% krahasuar me një vit më parë. Investimet nga Kosova në vitet e fundit po ndjekin një tendencë në rritje dhe janë të orientuara kryesisht në sektorin e tregtisë. Stoku i investimeve ka arritur në 330 milionë euro, në rritje me 47% krahasuar me një vit më parë.

Në listën e investimeve sipas shteteve, megjithatë, mungojnë investitorë të rëndësishëm, si Kanadaja. Flukset e reja të investimeve kanadeze në përgjithësi nuk detajohen për shkak të detyrimit të konfidencialitetit, sepse ato lidhen kryesisht me një investitor të vetëm, Bankers Petroleum.

Të dhënat mbi investimet kanadeze janë të disponueshme vetëm për stokun e tyre, që sipas Bankës së Shqipërisë në tremujorin e parë të këtij viti arriti në 1.74 miliardë euro, në rritje me 16% krahasuar me një vit më parë. Edhe në këtë rast, këto investime janë zyrtarisht kanadeze, por pronari përfundimtar i kompanisë është një kompani kineze./ Monitor.al