Kriza ekonomike/ Ekspertët ngrenë alarmin: Biznesi i vogël, drejt falimentimit

8 Qershor 2022, 12:42, Ekonomi CNA

Kriza ekonomike/ Ekspertët ngrenë alarmin: Biznesi i vogël, drejt

Foto ilustruese

Shoqatat e biznesit, sipërmarrësit dhe ekspertët e ekonomisë në vend ngrenë alarmin për situatën e biznesit të vogël në Shqipëri.

Kreu i Shoqatës së Biznesit të Vogël e të Mesëm, Albert Nasto, akuzoi Qeverinë se ka hartuar një plan ogurzi, sipas tij me qëllim shkatërrimin e ekonomisë së këtij vendi.

Kryetari i Shoqatës për Mbrojtjen e Sipërmarrjes dhe Tregtisë, Nikollaq Neranxi, shprehu shqetësimin se mafia shtetërore po nxjerr bizneset nga tregu.

Ai paralajmëroi se do të çojë në Gjykatën Kushtetuese ligjin për fiskalizimin.

I ftuar në studion e "Syri TV", Bujar Muço, nënkryetar i Shoqatës së Biznesit të Mesëm dhe të Vogël, tregoi më shumë në lidhje me takimin e djeshëm me disa përfaqësues të PD-së, si dhe tregoi kërkesat drejtuar qeverisë për t'i ardhur në ndihmë biznesit të vogël dhe të mesëm.

“Dje ne zhvilluam një takim me disa përfaqësues të shoqatës së PD-së dhe me doktor Berishën ku i shprehëm shqetësimet që ka sot biznesi i mesëm dhe i vogël shqiptar.

Patëm një pjesëmarrje të madhe të të gjithë grupeve të interesit, nuk ishte vetëm shoqata e biznesit të mesëm, por edhe e tregtarëve, kishte avokatë, farmacistë e të tjerë.

Ne diskutuam për disa problematika, por 3 apo 4 ishin kryesoret:

Çështja e gjendjes aktuale që ka gjendja e biznesit të vogël që është në mbijetesë, drejt falimentimit, çmimet e larta të blerjes së mallrave duke nisur nga nafta.

Në të gjithë diskutimet që zhvilluam rreth dy orë e gjysmë, ne dolëm në konkluzionin që i kemi bërë thirrje qeverisë për ndërhyrje urgjente për të marrë disa masa.

Masat kryesore duhet të jenë: Shtyrja e procesit të legalizimit që rëndon drejtpërdrejt në biznesin e vogël dhe të mesëm dhe afati i fundit që ka lënë qeveria për fikskalizim është 30 qershori dhe ne themi është e pamundur për ta përballuar biznesi.

Ne kërkuam ndërhyrjen për marrëveshje me disa banka të nivelit të mesëm për kreditimin pasi biznesi i vogël dhe i mesëm e ka të pamundur të kreditohet.

Janë dy arsye: sepse nuk ka kolateral dhe e dyta se ka interesa shumë të larta për të përballuar një biznes kredinë”, u shpreh ai.