Ekspertja e ekonomisë ngre alarmin/ “Çmimet po rriten abuzivisht”

14 Shkurt 2024, 17:37, Ekonomi CNA

Ekspertja e ekonomisë ngre alarmin/ “Çmimet po rriten

Foto ilustruese

Teksa pas dy vitesh, inflacioni ka pësuar rënien më të fortë, çmimet vijojnë të rriten. Të dhënat e fundit nga INSTAT, tregojnë se në janar inflacioni arriti normën 3.4%, megjithatë nuk ndodhi e njëjta gjë edhe me çmimet, pasi ushqimet u rritën me 5.3%.

Ekspertja e ekonomisë, Romina Radonshiqi në një intervistë për CNA TV, me gazetaren Fabjona Pasho ngre alarmin se çmimet po rriten abuzivisht.

Ajo thekson se Autoriteti i Konkurrencës duhet të marrë masa të menjëhershme, duke zhvilluar kontrolle nëse ka abuzim me çmimet.

"Kemi akoma një problematikë shumë të madhe me inflacionin për produktet bazë, inflacion dyshifror. Tregtarët kanë rritur marzhet e fitimit, abuzivisht, sepse duhej të ishte reflektuar një çmim më i ulët. Duke njohur psikologjinë e çmimit, kanë ulur këto produkte me një çmim minimal, ose nuk i kanë ulur fare. Në këtë moment është e vështirë që tregtarët të reflektojnë uljen e çmimeve, kur nuk e kanë reflektuar deri tani. Do i duhet Autoritetit të Konkurrencës të hetojë për disa produkte nëse ka abuzime."

Sipas Radonshiqit, kategori të caktuara, të tilla si pensionistët, hasin vështirësi në përballimin e produkteve bazë të jetesës.

Ekspertja e ekonomisë, Romina Radonshiqi

"Godet grupet vulnerabël, të cilët janë personat me ndihmë ekonomike, pensionistët, madje edhe ato familje me të ardhura nën mesatare, që e kanë shumë të vështirë të mbyllin fundin e muajit."

Radonshiqi i bën apel qeverisë të subvencionojë fermerët, të cilët së fundmi kanë protestuar për shkak të mbetjes stok të produkteve.

"Në 2024, kemi parë dhe buxhetin që nuk ka mjaftueshëm fonde për të nxjerrë bujqësinë nga kjo situatë. Edhe projektet e IPARD-it që janë pezulluar, është një problematikë që nëse nuk do të ekzistonte, ndoshta bujqësia do të avanconte më tepër. Fermerët nuk gjejnë treg shitje, sepse produktet që vijnë nga importi janë me çmime më konkurruese sesa produkti vendas. I takon qeverisë të ndërhyjë me subvencione, me politika lehtësuese, ndoshta dhe politika shtrënguese për importin, me qëllim që të favorizojë produktin vendas."

Ndër të tjera, Radonshiqi foli edhe për taksimin e profesionistëve të lirë, si edhe mungesën e orientimit të duhur të të rinjve në tregun e punës, e cila rrit shkallën e papunësisë dhe nxit emigrimin./ CNA TV