Pas dy muajsh ia lidhin më në fund, pse ia mori valles qytetari

28 Maj 2025, 22:03, Denoncim CNA

Emisioni “Stop” ndodhet në lagjen “Aqif Pasha” në Elbasan, pasi Shefqet Dybeli është drejtuar në redaksinë e “Stop” për një problem, që ka me OSHEE-në.

Vajza e tij, Merita Samarxhiu, e cila jeton prej vitesh në Itali ka një apartament, ku nuk ka të lidhur energjinë elektrike, pasi ka jetuar jashtë. Para dy muajsh i ati, Shefqeti, pasi është pajisur me prokurë nga e bija, ka aplikuar për një matës të ri që në prill. Ka paguar 217 mijë lekë dhe tani, në fund të majit ende nuk e kane pajisur me matës.

“Shkova për këtë problem tek OSHEE-ja dhe më thanë që nuk ka sahat kur të na vijnë. Nuk më dhanë një shpjegim, por më thanë që nuk ka sahat dhe se ka shumë njerëz që kërkojnë për të pasur një sahat. Ne kemi shkuar çdo ditë tek elektriku, por na kanë thënë që nuk ka. Na kanë lënë pa drita dhe na kanë shqetësuar shumë, vajza mund të vijë shumë shpejt nga Italia. Këtë kërkoj që të na vijë sahati dhe sa më shpejt”, tha denoncuesi.

“Stop” iu drejtua OSHEE-së Elbasan, ku inxhinieri Julmir Boja, tha se vonesa ka ardhur, për shkak të fluksit të madh të kërkesave për matës dhe avarive të tjera. Por ai premtoi t’ia zgjidhë problemin qytetarit.

“Vonesa ka ardhur për shkak të fluksit të punëve që ne kemi pasur gjatë kësaj periudhe. Ka pasur fluks për kërkesën e vendosjes së matësave të rinj, plus që problemet dhe avaritë që ka pasur sistemi elektrik gjatë kësaj periudhe. Por, do ta zgjidhim që sot këtë problem, që tani. Menjëherë sapo të bëhet koalidimi i matësit do të shkojë grupi i punës për vendosjen e tij në terren. I kërkojmë shumë ndjesë qytetarit, por sot do i realizohet shërbimi”, tha inxhinieri Julmir Boja.

Pas ndërhyrjes së “Stop”, punonjësit e OSHEE-së Elbasan, vendosën matësat e këtij pallati, duke sjellë menjëherë dritat. Meqë gazetarja fitoi bastin me qytetarin, Shefqet Dybeli ia merr valles në banesën e elektrifikuar./tvklan.al