Investigimi/ Thellohet afera me oksigjenin mjekësor në Shqipëri

22 Nëntor 2024, 14:13, Denoncim CNA

Investigimi/ Thellohet afera me oksigjenin mjekësor në Shqipëri

Foto ilustruese

CNA ka raportuar dhe investiguar pak kohë më parë, më 10 tetor të vitit 2024, një çështje mjaft problematike dhe të ndjeshme në lidhje me oksigjenin për pacientët, për spitalet në Shqipëri.

Sipas të dhënave që ne mundëm të siguronim zyrtarisht nga qeveria në Maqedoninë e Veriut dhe nga qeveria e Kosovës, rezultonte se çmimi i oksigjenit që vinte në spitalet shqiptare ishte tri herë më i shtrenjtë. (LEXO KETU)

Çmimi i oksigjenit në Kosovë

Çmimi i oksigjenit për Maqedoninë e Veriut

Oksigjeni për përdorim mjekësor me pastërti 99.5%

Në fakt, e gjithë kjo sipas materialeve që ne dispononim në atë kohë vinte për shkak të monopolit në treg, për shkak të kontrollit që bënin një apo dy kompani në marrëveshje me njëra-tjetrën.

Duhet të ishte Autoriteti i Konkurrencës që të ndërhynte, ndoshta dhe vetë Ministria e Shëndetësisë, e cila na dha një raport të plotë mbi çmimin, procedurën e ndjekur, që në fakt, nuk dukej të ishte problematike.

Kthim përgjigje pë CNA, shifrat në dokumente, çmimi i oksigjenit për Shqipërinë

Por çfarë kemi mundur ne të zbulojmë më tej. Pse çmimi është më i shtrenjtë? Pse qeveria shqiptare paguan më shumë se qeveria e Kosovës apo ajo e Maqedonisë së Veriut?

Përtej monopolit, ne mundëm të siguronim disa praktika doganore, konfidenciale, të cilat jemi të gatshëm t’ua vendosim përpara organeve kompetente që na tregojnë se kompania “Messer” ka ndërtuar një kompani bijëzë “Messer Albagaz”, duke ngritur kështu një skemë të plotë që shkon tek monopoli, tek rritja e çmimeve, te kontrolli i tregut, te gjithçka.

Ne kemi mundur të sigurojmë disa fatura, të cilat na tregojnë se për të njëjtën sasi oksigjeni, i cili është liquid oxygen apo liquid oxygen medical, për sasi të njëjta, çmimet janë shumë më të larta. Pra, një skemë mes nënës dhe bijëzës.

Pse shqiptarët duhet ta paguajnë oksigjenin 3-4 herë më shtrenjtë?
15 Tetor, 14:09

ÇFARË DO TË THOTË KJO SKEMË?

Skema tregon qartë se në Shqipëri bijëza duhet të deklarojë çdo vit pranë Agjencisë Kombëtare të Barnave, barnat medikale që ajo sjell dhe sipas ligjit shqiptar nuk lejohet që fitimi për produktet mjekësore të jetë më shumë se 11%.

POR ÇFARË NDODH? SI MANIPULOHET KJO SKEMË?

Kur bijëza, pra kompania “Messer Albagaz”, bën deklarimet në Shqipëri, ofertën nga mëma e merr maksimale.

Lind pyetja: Çfarë do të fitojë bijëza?

S’ka nevojë fare, është mjaft e thjeshtë. Fitimi shkon direkt te mëma. Mëma, së cilës ne i kemi gjetur fatura për të njëjtën sasi gazi 2 mijë euro dhe fatura për të njëjtën sasi gazi për Shqipërinë është 18 mijë euro.

Dikush do të thotë, a është e njëjta? Po. Me të njëjtat analiza laboratorike. Kjo sipas praktikave të plota të dorëzuara në dogana.

Investigimi/ Si oksigjeni për pacientët në Shqipëri blihet 3-4 herë më shtrenjtë se në vendet e rajonit
10 Tetor, 18:34

Për ta bërë edhe më të thjeshtë.

Një kompani bijë i merr ofertën më të shtrenjtë kompanisë mëmë dhe të gjitha paratë shkojnë jashtë, pra të gjitha paratë shkojnë te mëma në Serbi.

Megjithëse atje oksigjeni është më i lirë. Shteti shqiptar e ka mjaft të thjeshtë të shohë rajonin, të shohë Kosovën, të shohë Maqedoninë e Veriut, të shohë praktikat doganore, të shohë sasitë, të njëjtat kode.

Megjithëse me sasitë ka një tjetër histori që CNA do ta sjellë në vijim, pasi spitalet shqiptare harxhojnë oksigjen edhe më shumë se disa nga spitalet kryesore të vendeve të rajonit, jo vetëm për shkak të numrit të pacientëve, por edhe pse pacientë nuk ka edhe brenda spitaleve shqiptare ka një diferencë të madhe në harxhimin e oksigjenit.

Është mjaft e thjeshtë skema. Mëmë e bijë luajnë me çmimin, krijojnë një treg monopol në Shqipëri dhe nuk paguajnë asnjë taksë shtetit shqiptar, pasi sipas të dhënave që morëm së fundi i është hequr dhe TVSH-ja.

OKSIGJENI MJEKËSOR NË SHQIPËRI, RAST AFERE

Investigimi/ Thellohet afera me oksigjenin mjekësor në Shqipëri

Oksigjeni mjekësor në Shqipëri është një rast afere, është një rast skandali, është një rast për t’u provuar a ka korrupsion, por që është një monopol me çmime të paravendosura, të kontrolluara dhe menaxhuara nga kompani që luajnë me skema me njëra-tjetrën.

Kjo tashmë është provuar nga praktikat që ne kemi në dorë. Flasim gjithmonë për sasi të njëjta oksigjeni me çmime 3-4-fish me të shtrenjta në Shqipëri, të cilat në rajon janë më lirë.

Ministria e Shëndetësisë e ka për detyrë të paktën t’u drejtohet me një shkresë kolegëve në rajon për të kuptuar se çfarë ndodh. Ka për detyrë për të kontrolluar sasitë në spitale dhe diferencat brenda spitaleve në Shqipëri dhe gjithçka del qartë, se si funksionon skema e aferës së oksigjenit në Shqipëri, të cilit i është shpikur edhe një term tjetër “oksigjen medikal”, ku në fakt është i njëjti oksigjen që tregtohet edhe te privati dhe shteti shqiptar e ka shumë të thjeshtë, mund të marrë të njëjtën kompani dhe të shikojë çmimin që e ka çuar te privatët apo si tregtohet në rajon për të kuptuar se deri ku shkon çmenduria e abuzimit me oksigjenin në Shqipëri./ CNA