Veliaj zhduk parkun/ Firmos ndërtimin e një pallati

16 Maj 2024, 20:57, Aktualitet CNA

Veliaj zhduk parkun/ Firmos ndërtimin e një pallati

Erion Veliaj

Aktivistët e Lëvizjes Bashkë kanë protestuar kundër ndërtimit të një pallati 7-katësh në parkun e vogël në zonën e Kombinatit, në rrugën Llambi Bonata, që ndodhet midis dy pallateve.

Arlind Qori ka kërkuar nga banorët e kësaj zone, rrugës Llambi Bonata në Kombinat që të protestojnë dhe të qëndrojnë kundër këtij projekti.

Ky pallat po bëhet me firmën e kryebashkiakut Erion Veliaj i cili e ka dhënë miratimin e tij që në 10 Janar të këtij viti.

Parku me pak pemë e shumë fëmijë do t’i jepet disa ndërtuesve të cilët do të shtojnë miliona euro në llogaritë e tyre bankare në kurriz të jetës së shëndetshme urbane dhe lojës së fëmijëve të asaj lagjeje.

“Fëmijët do ta ëndërronin një hapësirë të tillë, një hapësirë ku mund të dalësh nga pallati me top e mos të të shtypë makina 50 centimetra nga dera e pallatit. Shumica dërrmuese e fëmijëve të Tiranës tashmë e kanë humbur hapësirat publike, tashmë i kanë humbur parqet. Sepse politikanët e korruptuar në bashkinë e Tiranës dhe në qeverinë e Republikës së Shqipërisë, politikanë si Erion Veliaj dhe Edi Rama përfitojnë miliona, bashkë me oligarkët e ndërtimit duke e kthyer qytetin në një shesh të përhershëm ndërtimi”, deklaroi Arlind Qori.

Ndër të tjera Qori tha se sa më gjatë të rrijë Veliaj larg burgut aq më të rrezikuara janë hapsirat publike dhe parqet.

Banorët, të cilët u mblodhën në lulishte u shprehën se në këtë zonë nuk ka vende të tjera çlodhjeje dhe argëtimi.

“Është e ardhmja këtu që po rritet, pavarësisht që mungojë kopshtet dhe lodrat dhe çdo gjë. Dhe e vetmja gjë që ka ngelur këtu duan të na e rrëmbejnë. Edhe ajrin që kemi pa lek duan të na e vjedhin. Të mendojmë për filizat që po rriten, për pensionistët që s’kanë ku të çlodhen edhe pse dy stola kanë tentuar të na venë, duke na injoruar gjithë kohës. As nuk na kanë begenisur duke ardhur të na shohin për asnjë problem që kemi ngritur zërin. Qoftë edhe për ujin edhe për çdo gjë”, u shpreh një nga zonjat e pranishme në protestë.

Banorët mes të tjerash denoncuan edhe faktin se Kombinati është lenë me gërmadhat e pallateve të shembura për shkak të tërmetit.

“Kombinati është bërë si gërmadhë. E vetmja lulishte që ka mbetur në Kombinat duan ta prishin, ta bëjnë sic janë bërë të gjitha pallatet që janë shembur. Le të japin leje ndërtimi ku janë shembur pallatet e tjera. Pse duhet të prishin një lulishte. Ka thënë që do mbjellim 2 milionë pemë. Hajde t’i shkulim njëherë 100 pemë këtu në Kombinat dhe ti mbjellin me ndonjë vend tjetër që të bëhen 3 milionë”, deklaroi një nga banorët./ CNA