U arrestua si bashkëpunëtor në atentatin në Elbasan/ Zbardhen detaje, 29-vjeçari me precedentë të theksuar kriminalë

3 Dhjetor 2025, 10:54, Kronika CNA

U arrestua si bashkëpunëtor në atentatin në Elbasan/

Policia ka dalë me një reagim zyrtar lidhur me arrestimin e një tjetër personi të përfshirë në atentatin ndaj biznesmenit në Elbasan. Në pranga është vënë shtetasi N. S., 29 vjeç, person me precedentë të theksuar kriminalë, në disa fusha, ndër to, për tentativë vrasjeje.

29-vjeçari bashkëpunëtor në atentat, është arrestuar për veprat penale “Vrasje me paramendim”, kryer në bashkëpunim, dhe “Prodhimi dhe mbajtja pa leje e armëve, armëve shpërthyese dhe municionit”.

Policia bën me dije se ka sekuestruar 1 automjet, 1 celular dhe sende të tjera që do t’i shërbejnë hetimit që vijon ende për zbardhjen e ngjarjes. Numri i të arrestuarve për atentatin ka shkuar në tre, pasi një ditë më parë u arrestua ish-ortaku i viktimës dhe roja i karburantit, ku ndodhi vrasja.

Njoftimi i policisë:

DVP Elbasan

Vijon operacioni policor i koduar "Strike", me objektiv identifikimin, kapjen dhe individualizimin e përgjegjësisë penale, të të gjithë shtetasve të përfshirë në vrasjen e shtetasit M. M. alias E. H..

Si rezultat i hetimeve dhe veprimeve të shpejta operacionale, është identifikuar dhe kapur një bashkëpunëtor i dyshuar në këtë krim.

I arrestuari, me precedent të theksuar kriminal në disa fusha, ndër to, për tentativë për vrasje.

Sekuestrohen 1 automjet, 1 celular dhe sende të tjera që do t’i shërbejnë hetimit.

Në vijim të veprimeve operacionale të kryera në bazë dhe për llogari të hetimeve intensive që po kryhen për të dokumentuar ligjërisht autorësinë dhe rrethanat e vrasjes së kryer më datë 30.11.2025, në ambientin e jashtëm të një karburanti në lagjen "Emin Matraxhiu", specialistët për Hetimin e Krimeve të Rënda ekzekutuan urdhrin e prokurorit, për ndalimin e shtetasit:

-N. S., 29 vjeç, banues në Prrenjas, për veprat penale “Vrasje me paramendim”, kryer në bashkëpunim, dhe “Prodhimi dhe mbajtja pa leje e armëve, armëve shpërthyese dhe municionit”.

Nga verifikimet rezultoi se ky shtetas kishte precedent penal për tentativë për vrasje, armëmbajtje pa leje, shtrëngim me anë të kanosjes/dhunës për dhënie të pasurisë, si dhe për vjedhje.

Ndërkaq, nga hetimet e deritanishme dyshohet se ai është përfshirë në ngjarjen e ndodhur mbrëmjen e datës 30.11.2025, në ambientin e jashtëm të një karburanti në lagjen "Emin Matraxhiu", ku u vra me armë zjarri, shtetasi M. M. alias E. H..

Hetimet vijojnë.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme. /CNA