Tubimi në Korçë/ Qytetarët: Protestojmë që të rinjtë të ndërtojnë të ardhmen në Shqipëri

5 Qershor 2026, 19:53, Aktualitet CNA

Qindra qytetarë iu përgjigjën thirrjes për t’u bashkuar në protestën e zhvilluar në Zonën Këmbësore të Korçës. Para nisjes së tubimit, pjesëmarrësit mbajtën një minutë heshtje në nder të efektivit të Policisë së Shtetit, Enea Mekolli, i cili humbi jetën një ditë më parë gjatë kryerjes së detyrës.

Me flamuj kombëtarë dhe pankarta në duar, protestuesit shprehën pakënaqësitë e tyre për një sërë çështjesh që, sipas tyre, prekin të ardhmen e vendit. Gjatë tubimit u dëgjuan edhe thirrje kundër klasës politike.

Një prej qytetareve tha se pjesëmarrja e lartë në protestë ishte një sinjal se qytetarët nuk duan të qëndrojnë indiferentë ndaj zhvillimeve në vend.

“Nuk prisja kaq njerëz sot. Isha pesimiste. Mendova që nuk do kishte pedonalja kaq shumë njerëz. Jam shumë e lumtur, e para sepse ne si komb kemi luftuar që ky komb të ekzistojë, gjuha shqipe të trashëgohet ndër breza. Shqipëria nuk është për t’u shitur dhe për të pasuruar politikanët tanë. Shqipëria është e shqiptarëve dhe ne do luftojmë me mirësjellje dhe dashuri”, u shpreh qytetarja.

Pjesëmarrësit ngritën gjithashtu shqetësime që lidhen me mbrojtjen e pronave, zhvillimin e zonave të ndryshme të vendit dhe largimin e të rinjve nga Shqipëria.

“Është protesta ime e parë dhe erdha për të ngritur zërin për një kauzë e cila është Zvërneci, por më tepër edhe për shumë kauza të tjera të cilat përfshijnë si paketën e maleve apo nëpërmjet ligjeve të çrregullta që janë marrë shumë toka të trashëgimtarëve tanë. Unë nuk jam kundër zhvillimeve, por jam kundër zhvillimeve të cilat i përkasin vetëm klasës së lartë dhe të pasur”, u shpreh një nga pjesëmarrësit.

Një tjetër qytetare tha se arsyeja e pjesëmarrjes në protestë lidhej me dëshirën që të rinjtë të ndërtojnë të ardhmen e tyre në Shqipëri.

“Unë kam dy vajza, njëra është aty dhe njëra është këtu, të cilat nuk dua t’i largoj nga Shqipëria. Dua të rrinë këtu në këtë vend, ku Zoti i ka dhënë gjithçka këtij vendi. Mendoj që Zvërneci ishte thjesht ajo pika që derdhi kupën sepse jam e sigurt që secili nga ne ka të paktën pesë arsye që ka dalë këtu. Që nga shpopullimi i Shqipërisë, te shëndetësia, arsimi dhe shumë çështje të tjera”, tha qytetarja.

Protesta u zhvillua pa incidente, ndërsa organizatorët paralajmëruan se reagimet qytetare do të vijojnë edhe në ditët në vazhdim. /CNA