E fundit!

10:46 Aktualitet

Skenarët e Erion Veliajt në protestën për Zvërnecin

Një protestë që parullën ka “Zvërnec”, por po t’i heqësh e...

Shkodër, 113 raste në vitin 2025/ Dita Botërore e Kancerit, apel për më shumë kontrolle

4 Shkurt 2026, 15:25, Aktualitet CNA

Shkodër, 113 raste në vitin 2025/ Dita Botërore e Kancerit, apel

Gjatë vitit 2025, në Spitalin Rajonal të Shkodrës janë identifikuar 113 raste të reja me kancer.

Në kuadër të Ditës Botërore kundër Kancerit, mjekët theksojnë një prirje shqetësuese, rritjen e numrit të pacientëve dhe diagnostikimin e sëmundjes në moshë gjithnjë e më të re. Kanceri i mushkërive mbetet forma më e shpeshtë, i ndjekur nga ai i gjirit.

“4 shkurti është ditë ndërgjegjësimi global mbi faktorët predispozues, ndërgjegjësim dhe strategjitë parandaluese. Të gjitha këto me qëllimin e uljes së mortalitetit. Ajo që ne po vëmë re është rritja e të prekurve në të gjithë vendin. Edhe në Shkodër, në 2025 janë zbuluar 113 raste të reja me kancer. Më shumë na shqetëson ulja e moshës, mosha të reja po preken gjithnjë e më shpesh nga kanceri. Ajo që në këshillojmë është kryerja e 'check up'-it, testet depistuese. Sepse ka disa lloje kanceri që mund të kapen në faza të hershme. Kanceri më i përhapur është kanceri i mushkërive i ndjekur nga kanceri i gjirit. Promovimi i jetës së shëndetshme, aktivitet fizik, moskonsumimi i duhanit janë këshillat që i drejtojmë popullatës. Kemi disa lloje terapish në Shkodër, më të shpeshta janë diagnozat e kancerit të gjirit, kolektoral, i stomakut”, u shpreh Kleva Qeraj, shefe e repartit paliativ në Shkodër.

Specialistët nënvizojnë se kontrollet periodike, "check-up"-et dhe depistimet janë thelbësore për parandalimin dhe zbulimin e hershëm të kancerit. Megjithatë, në shumë raste pacientët paraqiten për mjekim vetëm kur sëmundja ka avancuar.

“Ka një lloj rritjeje të interesit për depistimet e gjirit, por sërish ndërgjegjësimi më i madh mbetet vetëm në muajin tetor. Fatkeqësisht ende zbulimi është në stade të vona. Në këtë ditë duhet që qeveritë, organizatat, personali mjeksor që të promovohen strategjitë, të mbështeten pacientët si dhe të theksojmë rëndësinë e kërkimit shkencor”, tha Qeraj.

Në këtë 4 shkurt, mjekët onkologë bëjnë thirrje për ndërgjegjësim më të madh të shoqërisë, mbështetje për të prekurit dhe investim në kërkime shkencore për luftën kundër kancerit./CNA