E fundit!

12:47 Kronika

Zjarret në qershor-korrik/ 29 autorë të arrestuar dhe të proceduar penalisht

29 autorë të zjarrvënieve në vend janë arrestuar dhe proce...

Roli i Fan Nolit në historinë e Kishës/ Fortlumturia e Tij Joani: Kontribut të paçmuar në tekstet kishtare

26 Mars 2025, 21:27, Aktualitet CNA

Roli i Fan Nolit në historinë e Kishës/ Fortlumturia e Tij Joani:

Fortlumturia e Tij, Joani ka folur në intervistën e tij dhe për figurën e Fan Nolit dhe rolin e tij në historinë e Kishës Ortodokse. Imzot Theofan Nolin, Kryepsikopi Joan e ka cilësuar si një figurë poliedrike që Perëndia i kishte dhënë talente të jashtëzakonshme.

Fortlumturia e Tij tregoi se gjatë periudhës së studimeve në Boston, u has me tekstet e shkruara nga Noli, të cilat tregonin qartë se kisha ishte më e rëndësishmja. Kryepiskop Joani thotë për Fan Nolin se ka një kontribut të paçmuar në tekstet kishtare dhe përgatitjen e autoqefalisë.

"Imzot Theofan Noli ka qenë figurë poliedrike. Ai ishte pajisur nga Perëndia me talente të jashtëzakonshme. Ishte poet, përkthyes i pashoq, zotërues i shumë gjuhëve, ekspert i mirë i muzikës, në vecanti të asaj fetare, diplomat i shquar, politikan dhe mbi të gjitha njeri i kishës. Ai dha një kontribut të paçmuar për ndërgjegjësimin kombëtar dhe përgatitjen e autoqefalisë, si edhe të teksteve kishtare.

Kur isha student në Boston, së bashku me Atë Artur Liolinin, punuan për disa kohë në organizimin e Bibliotekës së Fan Nolit. Aty hasëm edhe në disa tekste të shkruara nga ai, që tregojnë qartë se për atë kisha ishte më rëndësishmja. Ai ka shkruar: “Nga të gjitha veprimtaritë e mia, dashuria ime e parë është kisha”. Ndërsa përkthimin dhe hartimin e Kremtores – një libër shërbese që përmban psalmet, odet dhe tropare të vitit liturgjik ortodoks – e ka quajtur “kënaqësinë e tij më të madhe” dhe “veprën, në të cilën janë përqëndruar përpjekjet e tij më të mëdha shpirtërore, letrare, muzikore dhe intelektuale”. Atë Arturi më ka treguar se Imzot Theofani shpesh thoshte: “Nëse në jetën politike kryevepra ime ka qenë pranimi i Shqipërisë në Lidhjen e Kombeve, në fushën e letrave kryevepra ime është Kremtorja”. Këto fjalë të tijat e tregojnë qartë kufirin ndërmjet politikanit dhe kryepeshkopit", u shpreh Fortlumturia e Tij./ CNA