web counter
LEXO PA REKLAMA!

SHKARKO APP

App Store
Google Play

E fundit!

x

Intervista e parë si Kryepiskop/ Fortlumturia e Tij, Joani rrëfen pagëzimin në kohën e komunizmit

26 Mars 2025, 20:13, Aktualitet CNA

Intervista e parë si Kryepiskop/ Fortlumturia e Tij, Joani rrëfen

Më 16 mars 2025, Fortlumturia e Tij, Joan Pelushi u zgjodh Kryepsikop i Tiranës, Durrësit dhe gjithë Shqipërisë. Fortlumturia e Tij u zgjodh drejtues i Kishës Ortodokse Autoqefale pasi Kryepiskopi Anastas ndërroi jetë.

Në intervistën e tij të parë si Kryepsikop, Fortlumturia e Tij Joani ka treguar se si i ra në dorë Dhiata e Re gjatë periudhës së gjimnazit, në një kohë që në Shqipëri mbizotëronte ateizmi. Kryepiskop Joani tregon se fillimisht Dhiatën e ka lexuar në frengjisht dhe pas leximit të saj diçka ndryshoi thellësisht në shpirtin e tij.

Intervista e parë si Kryepiskop/ Fortlumturia e Tij, Joani rrëfen

Fortlumturia e tij shprehet se pas kontaktit me Ungjillin vendosi të pagëzohej, gjë e cila ndodhi pak kohë më vonë nga Atë Kozmai. Po ashtu Kryepsikopi i Kishës Ortodokse Autoqefale, Fortlumturia e Tij Joani ka folur dhe për njohjen me Atë Kozmain dhe kush ja ka prezantuar atë.

“Rinia ime gjatë ateizmit ka qenë pak a shumë si e gjithë të rinjve në atë kohë. Ne u rritëm pa praninë e besimit institucional, por në shpirtin e çdo njeriu ndjehen dhe ndodhin gjëra të ndryshme, sepse ne nuk jemi kopje. Gjithsekush ka veçantinë e tij dhe rrugën e tij. Jeta jonë ka një vazhdimësi, ku e kaluara jonë ndikon në ngjarjet që na ndodhin tani, ose në të ardhmen. Takimi im i parë me besimin ndodhi në vitin 1974, kur isha në vitin e katërt të gjimnazit. Sapo kisha mësuar frëngjisht dhe më ra në dorë një libër - Dhiata e Re - në frëngjisht. Ai që ma dha nuk dinte se çfarë libri ishte. Kur e lexova, diçka ndryshoi thellësisht në shpirtin tim. Mënyra sesi ishte shkruar, fjalët e thjeshta të Zotit, por shumë të thella, më bindën për vërtetësinë e tij. Këto janë të vërteta psikologjike. Edhe kur dikush të tregon diçka, shpeshherë, mënyra si ta thotë të bind që është e vërtetë.

Në atë kohë nuk praktikohej ndonjë besim, të paktën tek të rinjtë që unë njihja. Nuk ishte se unë praktikoja një besim dhe pastaj u ktheva. Kontakti im me Ungjillin ishte besimi im i parë. Atëherë vendosa të pagëzohem, gjë që realizua pak më vonë. Prindërve nuk u thashë, jo sepse ishin kundër, por nuk doja t’i trembja. Por nëna ime e kishte kuptuar.

Atë Kozmain e kam njohur nëpërmjet disa motrave besimtare me banim në Korçë, të njohura si motrat Cico, të cilat i kemi njohur nga Theofan Popa. Së bashku me Petro Zhejin, që u bë nuni im, i kemi vizituar ato shpesh herë. Kemi vizituar gjithashtu edhe Atë Kozmain, i cili banonte në fshatin Bestrovë në Vlorë”, është shprehur Fortlumturia e Tij.

 

Gjatë intervistës së tij të parë si Kryepiskop, Fortlumturia e Tij Joani ka treguar dhe pagëzimin e tij, i cili është bërë në fshehtësi për shkak të regjimit.

Fortlumturia e Tij ka thënë se pagëzimi i tij është bërë në bodrumin e shtëpisë së Atë Kozmait, por megjithatë nga ana kishtare nuk ka pasur asnjë mungesë dhe është njësoj i vlefshëm si pagëzimi në Kishë.

“Në kohë normale pagëzimi bëhet në kishë, ndërsa në kohë persekutimesh pagëzimi është bërë në fshehtësi. Nga ana kishtare nuk i mungon asgjë dhe është njësoj i vlefshëm, nëse është bërë nga një prift ose peshkop kanonik. Unë u pagëzova në bodrumin e shtëpisë së Atë Kozmait. Ishte ai, nuni dhe unë, ndërsa jashtë shtëpisë rrinte si roje djali i Atë Kozmait, Ilia, që sot është prift në Vlorë”, tha Kryepiskop Joani./ CNA

 





Lajmet e fundit nga