“Nuk u kam kthyer përgjigje të korruptuarve”/ Dumani dëshmon në GJKKO

25 Mars 2025, 12:20, Aktualitet CNA

“Nuk u kam kthyer përgjigje të korruptuarve”/ Dumani

I penduari i drejtësisë, Nuredin Dumani, ka dhënë sot dëshminë e tij në Gjykatën e Posaçme. I pyetur nga avokatja nëse ka dhënë dëshminë kur u arrestua nga Policia e Elbasanit, Dumani ka thënë se nuk u ka dhënë përgjigje të korruptuarve.

“Nuk u kam kthyer përgjigje të korruptuarve”, ka deklaruar Dumani.

Më pas Dumani ka thënë se dëshminë e tij e ka dhënë në spitalin e burgut.

“Kur jam arrestuar më çuan në spitalin e Fierit, isha i plagosur. Pastaj shkova në spitalin ushtarak. Tre persona, Ardian Çipa, Tonin Vocaj dhe Kreshnik Ajazi erdhën të më takonin. Pas arrestimit, deklarimet e para i kam bërë te spitali i burgut”, ka thënë Dumani.

I penduari Dumani gjithashtu ka thënë se një polic në Elbasan i jepte informacione për Talo Çelën dhe për këtë informacion, Dumani i jepte efektivit 10 mijë euro në muaj.

“Në 2019 një shef krimesh në Elbasan që Henrik Hoxha e kishte shok, më jepte informacione për Talo Çelën. Shefin ma prezantoi Henriku, ai kërkonte 10 mijë euro në muaj”, ka dëshmuar Dumani.

Sa u përket atentateve të bëra ndaj Elton Kilës, i njohur ndryshe si Oti, Dumani ka thënë se Suel Çela ishte i interesuar për vrasjen e tij. Dumani ka deklaruar se Elton Kilën e njeh personalisht dhe ka treguar se ditën e atentatit ndaj tij, ku dhe u plagos vetë, kishte një mitraloz me 200 fishekë dhe një kallash, të cilët ia ka dhënë kushëriri i tij.

“Suel Çela ishte i interesuar për vrasjen e Oti Kilës. Ditën e ngjarjes isha vetëm në makinë, kur u qëllova isha shofer. Më qëlluan nga mbrapa. Më pas u ula te sedilja e pasagjerit në makinën 'X5' kur u plagosa. Oti Kilën e njihja personalisht, kam ndenjur me atë bashkë me vëllain tim. I kemi shitur një makinë dhe i kemi blerë një makinë.

Në të njëjtën ditë u bë shitblerja. Ditën e ngjarjes kisha mitraloz me 200 fishekë dhe një kallash. Mitralozin ma dha çuni i xhaxhait tim. Makinën për ngjarjen e bleva rreth 5-6 mijë euro, më thanë që ishte e vjedhur në Greqi, por nuk e di”, është shprehur Dumani./ CNA