Rama në “Le Point”: Shqipëria pa frikë ndaj Iranit dhe e vendosur në krah të Perëndimit

26 Mars 2026, 08:56, Aktualitet CNA

Rama në “Le Point”: Shqipëria pa frikë ndaj Iranit

Kryeministri i Shqipërisë, Edi Rama, ka dhënë një intervistë për "Le Point", ku ka trajtuar çështje kyçe të politikës së jashtme dhe rolit të vendit në arenën ndërkombëtare.

Duke folur për raportet me Iranin, Rama theksoi se Shqipëria mban një qëndrim të prerë dhe është në linjë me politikën e Shtetet e Bashkuara të Amerikës. Ai rikujtoi se Tirana zyrtare nuk ka marrëdhënie diplomatike me Teheranin dhe se vendi ka pranuar në territorin e tij anëtarë të opozitës iraniane.

Kreu i qeverisë u shpreh se shqiptarët nuk tremben nga kërcënimet, duke e lidhur këtë qëndrim me historinë e vendit dhe mbrojtjen e hebrenjve gjatë Luftës së Dytë Botërore.

“Asnjëherë nuk duhet t’i pyesni shqiptarët nëse kanë frikë. Ne nuk kemi frikë. Shqipëria ka mbrojtur hebrenjtë gjatë Luftës së Dytë Botërore, dhe e njëjta filozofi na udhëheq edhe sot. Duhet të flitet me të gjithë, përveç terroristëve si regjimi në Iran”, ka deklaruar ai.

Në intervistë, ai nënvizoi rëndësinë e anëtarësimit të Shqipërisë në NATO, si një garanci sigurie, si dhe synimin strategjik për t’u bërë pjesë e Bashkimit Europian.

“Vendi im ka përvojë historike nga diktatura komuniste që e bën të kuptueshme nevojën për qëndrime të forta kundër agresionit të jashtëm”, ka thënë ai.

Rama foli edhe për balancën diplomatike, duke mbështetur dialogun ndërkombëtar, por duke qëndruar i qartë në mbështetje të Ukrainës dhe presidentit Volodymyr Zelensky.

“Ne nuk mund të heqim dorë nga roli ynë, por duhet të flasim me të gjithë dhe të respektojmë historinë dhe parimet tona”, është shprehur Rama.

Sa u përket investimeve, ai hodhi poshtë pretendimet për privatizim të ishullit të Sazanit, duke e cilësuar projektin si zhvillim turistik dhe mjedisor, në bashkëpunim me emra të njohur si Jean Nouvel.

Në fushën e mbrojtjes, Rama bëri të ditur se Shqipëria do të vazhdojë të furnizohet me pajisje ushtarake nga partnerë të ndryshëm ndërkombëtarë, përfshirë kompaninë "Thales Group".

“Shqipëria ka blerë sistemin radar GM400 Alpha nga Thalès”, shkruan "Le Point".

Duke komentuar zhvillimet e brendshme, ai mohoi akuzat për pastrim parash dhe theksoi se vendi funksionon mbi bazën e ligjit dhe standardeve ndërkombëtare.

Sipas “Le Point”, Rama paraqitet si një lider me profil të fortë ndërkombëtar, i orientuar qartë drejt Perëndimit, ndërsa zhvillimet politike në vend konsiderohen pjesë e një demokracie aktive./ CNA