Qëndrimi i Spiropalit për parlamentin/ Kikia: Në vend të konstatimit duhet sugjeruar zgjidhje

3 Prill 2026, 18:04, Aktualitet CNA

Qëndrimi i Spiropalit për parlamentin/ Kikia: Në vend të

Gazetari Mentor Kikia ka komentuar ditën e sotme deklaratën e ish-ministres Elisa Spiropali lidhur me trazirat në seancën e fundit plenare. Kikia shprehet se bashkohet me konstatimet e saj e cila ka qenë edhe ish-kryetare parlamenti, por shton se ka edhe më shumë probleme se aq.

Ai shprehet se niveli intelektual dhe politik i parlamentit është më dramatiku që ka qenë ndonjëherë, ndërsa shton se nuk sot situata ka nevojë për zgjidhje dhe jo konstatime.

Kikia shkruan se Spiropali, në vend të konstatimit, duhet të japë një shembull duke qenë se është ende pjesë e atij parlamenti.

Reagimi i plotë:

Jam shumë dakord me Elisen, por…..

Elisa Spiropali ka shprehur qëndrimin e saj kritik ndaj parlamentit.

Nuk mund të mos konsiderohet ky qëndrim, pasi ajo ka qenë kryetare e parlamentit, nën të njëjtën maxhorancë.

Ja disa konstatike të saj:
-Parlamenti po dështon të prodhojë politikë.
-Konflikti banal po zëvendëson funksionin.
-Parlamenti nuk po ushtron rolin e tij përfaqësues dhe kontrollues ndaj qeverisjes dhe institucioneve.
-Po bjerret besimi.
-Po dobësohet ideja e Republikës.

Unë bashkohem me çdo konstatim të ish Kryetares së Parlamentit të Shqipërisë, edhe pse ka shumë më shumë probleme se kaq.

Por, këto janë vetëm konstatime. Për më tepër, konstatime të bëra me kohë nga soji i kritikëve jashtë partiakë.

Niveli intelektual dhe politik i parlamentit, aktualisht është më dramatiku që kemi patur ndonjëherë.
Unë e kam emërtuar fenomenin si “Zeqinerizimi i parlamentarizmit shqiptar”.

Pra, sot nuk ka nevojë shumë për konstatime. Situata ka nevojë për zgjidhje. Padyshim që zgjidhjen nuk mund t’ia kërkoj apo t’a pres (vetëm) nga Spiropali. Por, në vend të konstatimit, ajo mund ta japë një shembull, një model, me aq sa mundet dhe aq sa e lejojnë. E ka një karrige në sallë, një kartë elektronike për të votuar dhe një mikrofon për të folur.

Kështu mund të fillojë ndryshimi, apo mund të sugjerohet zgjidhja.

Me konstatimet merremi ne të tjerët! /CNA