Prezantohet manifesti politik “Lule Bore”/ Berisha: Propaganda po shkatërron gjuhën e të vërtetës në Shqipëri

22 Maj 2026, 21:54, Aktualitet CNA

Prezantohet manifesti politik “Lule Bore”/ Berisha: Propaganda po

Në selinë e Partisë Demokratike u promovua manifesti politik “Lule Bore” i autorit Andi Mustafaj.

Gjatë këtij aktiviteti, kryetari i PD-së, Sali Berisha, vlerësoi librin si një instrument të çmuar për të kuptuar realitetin e vështirë nën një diktaturë autokratike, ku propaganda po përdoret për të mbjellë konfuzion dhe cinizëm në shoqëri.

Berisha bëri një analizë kritike mbi ndikimin e medias së kontrolluar nga qeveria, duke e cilësuar atë si një formë të rëndë korrupsioni që shkon përtej politikës së ditës. Ai theksoi se regjimi ka shkatërruar kontratën themelore të gjuhës, duke e përdorur atë për të fshehur realitetin dhe për të mashtruar qytetarët në mënyrë të përsëritur.

Sipas kreut të PD-së, ndryshe nga diktatura e kaluar, regjimi aktual përdor "të keqen banale" për të krijuar indiferencë tek qytetarët, duke u paraqitur kriminelët si viktima dhe duke zhvlerësuar çdo standard moral.

Nga ana e tij Mustafaj theksoi se libri është një ftesë për të gjithë demokratët që të rigjejnë guximin për të propozuar dhe ndërtuar, duke u shkëputur nga cikli shkatërrues i kritikës boshe që shërben vetëm për të mbajtur regjimin në këmbë.

“Kësaj here një propagandë e 90% të mediave që kontrollohet nga qeveria, ka shkatërruar kontratën themelore të qytetarit me kombin që është kontrata e gjuhës.Kontratë në të cilën bukës i thotë bukë, shëndetit i thotë shëndet, vdekjes i thotë vdekje.

Kjo propagandë, në këtë regjim, duke përdorur eufemizma, duke përdorur mashtrime të përsëritura nga mëngjesi në darkë, për të kundërtat e asaj që është realiteti.Kjo ku arrin? Arrin në atë që qytetari thotë ‘as kjo as ajo, rri në punën time’. Arrin në të cilën e vërteta zhduket, dhe nuk ka më vlerë, sepse gjuha, përdoret gjuha për ta fshehur atë.

Për të mashtruar përdoret propaganda e qeverisë.Dhe këtu, Andi Mustafa përshkruan bukur konfuzionin dhe cinizmin. Janë dy pasojat më kryesore të kësaj veprimtarie.Pra, shih ku jemi ne. Ne jemi opozitë në këto kushte.Na vendosën mure. Qytetarëve u vendosën mure, burg, mure, burgun në mendjen e tyre. Zhvlerësohen gjërat. Paraqiten kriminelët në ekrane.

Paraqiten përdhunuesit në ekrane. Paraqiten krerët e organizatave kriminale për të ngjallur, për të ngjallur dhimbshmëri, pasi kanë vjedhur me qindra milionë dhe kanë vdekur qindra e qindra e mijëra shqiptarë për ilaçe.

Pra, leximi i librit ndalet në këtë konfuzion të mbjellë nga regjimi.Dhe ky është një kontribut i madh. Nuk ka formë më të rëndë korrupsioni se korrupsioni i gjuhës.Bota ime, thotë një filozof i njohur që i ka kushtuar jetën gjuhës, ‘është gjuha ime, bota ime kufizohet tek gjuha ime’.

Por ne si opozitarë duhet ta kemi të qartë këtë. Në qoftë se ne nuk luftojmë nga mëngjesi në darkë kundër saj, ne mbetemi të pashpresë. Por ne duhet të kemi vetëdijen se lufta kundër saj është një detyrë, një imperativ i veprimtarisë sonë.

Manifesti, siç e quaj unë me shumë të drejtë, paraqet në një mënyrë do të thosha të habitshme, të habitshme për mirë, problemet tona organizative.Do t’ju them një gjë këtu juve, se këto ditë kam lexuar një raport të hollësishëm, të gjatë të Institutit Republikan Amerikan për Partinë Demokratike.

Ata kanë ardhur, kanë bërë një studim jashtëzakonisht të çmuar. Një mbështetje shumë e madhe për ne. Për çdo demokrat e demokrate. Se si ne duhet të organizohemi, se si ne duhet të funksionojmë, se si ne duhet të digjitalizohemi, se si ne duhet të përcjellim mesazhin dhe të funksionojmë.

Andi Mustafa i kushton një kapitull, absolutisht me të gjitha principet e këtij studimi, dhe ky nuk e ka lexuar atë! Jo se libri ka dalë kohë përpara se të bëhej studimi. Por këtu, ky e ka shkruajtur atë kapitull pikërisht nga angazhimi i madh intelektual dhe demokrat se si duhet të transformohet kjo parti.Se cilat janë potencialet tona të pamohueshme. Ndaj dhe unë them, çdo demokrat e demokrate, dhe çdo opozitar dhe opozitare duhet ta lexojë këtë libër”, tha Berisha./ CNA