Përplasjet për aeroportin e Vlorës/ Karakaçi: Janë shkaktuar vonesa dhe dëme, shteti do të marrë masa

22 Maj 2026, 12:34, Aktualitet CNA

Ministri i Infrastrukturës dhe Energjisë, Enea Karakaçi, në një konferencë për mediat ka folur lidhur me konfliktin për aeroportin e Vlorës mes dy kompanive “Mabco” dhe “2A”.

Karakaçi u shpreh se çdo ditë bllokimi apo vonese punimesh në këtë aeroport përkthehet në humbje ekonomike për operatorët turistikë, komunitetin lokal dhe buxhetin e shtetit.

Ai u shpreh se kjo është shqetësuese ndërsa shtoi se kjo sjellje nga dy palët e përfshira në konflikt nuk do të tolerohet dhe shteti do të shfrytëzojë të gjitha mjetet ligjore për të garantuar repsektimin e detyrimeve kontraktore.

“Do të doja që të shfrytëzoja këtë rast për të adresuar një nga çështjet më sensitive të ditëve të fundit që lidhet me aeroportin e Vlorës. Dua të theksoj se aeroporti është një nga projektet më të rëndësishme infrastrukturore në Shqipëri. Shteti ushtron kompetenca të plota mbikëqyrëse dhe rregullatore. Mosoperimi apo bllokimi i tij nuk është thjesht çështje biznesi privat, është çështje e interesit publik dhe shtetëror. Çdo ditë vonesë apo bllokim përkthehet në humbje ekonomike për operatorët turistikë, komunitetin lokal dhe buxhetin e shtetit. Çdo infrastrukturë koncesionare me karakter publik dhe strategjik mbahet nën kujdesin e shtetit, i cili vepron si garantues i fundit i operacionalitetit të tyre. Ministria e Infrastrukturës dhe Energjisë ka ndjekur çdo fazë të procesit të ndërtimit. Të drejtat dhe detyrimet e të gjitha palëve janë respektuar në mënyrë të plotë. Ministria vëren me shqetësim se sjellja e palëve, bllokimi fizik i kantierit, konfliktet gjyqësore mes aksionerëve, akuzat penale kanë shkaktuar vonesa kritike dhe dëm reputacional ndaj projektit. Kjo sjellje nuk do të tolerohet dhe shteti do të shfrytëzojë të gjitha mjetet ligjore për të garantuar respektimin e detyrimeve kontraktore. Konflikti është një mosmarrëveshje e pastër civile, që ka kaluar nga debat aksionar në betejë ligjore. Ministria nuk është palë në këtë konflikt dhe nuk favorizon asnjërin prej dy subjekteve. Konflikti aktual mes dy subjekteve tregtare nuk do të lejohet të sjellë pasoja mbi shtetin, ekonominë dhe qytetarët. Pavarësisht natyrës së mosmarrëveshjes asnjë nuk ka të drejtë të mbajë peng një infrastrukture me rëndësi kombëtare. Ministria ka ndjekur hapat ligjorë dhe është e përgatitur të përdorë instrumentet e mëtejshme konktraktore për vijimin e ndërtimit të aeroportit”, u shpreh Karakaçi. /CNA