web counter
LEXO PA REKLAMA!

SHKARKO APP

App Store
Google Play

Përmbytja në fshatin Voskop në Korçë/ Banorët tregojnë vështirësitë

22 Nëntor 2025, 13:05, Aktualitet CNA

Përmbytja në fshatin Voskop në Korçë/ Banorët

Në njërën prej lagjeve të fshatit Voskop të Bashkisë Korçë, lumi doli nga shtrati për shkak të reshjeve e prurjeve të mëdha ditën e djeshme.

Njëri prej banorëve të fshatit tregon situatën e vështirë që përjetoi gjatë mbrëmjes kur uji i lumit të Gjonomadhit vërshoi në banesën dhe magazinën e tij.

Dëmet sipas Tefik Shahollit janë të mëdha si në banesë ashtu edhe në magazinën që mbante prodhimet bujqësore dhe veglat e punës.

Shaholli tregon se si u përballën fillimisht me situatën, ndërsa pas mbërritjes së ekipit të emergjencave u bë e mundur hapja e një kanali dhe vendosja e një tubacioni që hoqi ujin nga magazina.

"Ditën e djeshme unë jam ngritur në dy të natës, kur shikoj ujë këtu komplet. I thashë gruas, se vetë i dytë jemi ne, fëmijët në emigracion, i thashë 'ngrihu se u mbytëm'. Uji kishte hyrë brenda, komplet ishte mbushur me ujë. Dola me lopatë nëpër ujë bashkë me gruan, uji kishte hyrë edhe brenda, i zumë dyert me ca lecka, por na u bë zarar. Uji kishte kapërcyer mbi urën. Deri në mëngjes vazhdoi kjo situatë, në luftë me ujin. Erdhën këta të emergjencave, hapën një kanal këtu në rruga, vendosën një tub", u shpreh ai. 

Ndërsa tregon dëmet e shkaktuara, e duke përjetuar një mbrëmje të tmerrshme, Shaholli lutet që mos të ndodhë më asnjëherë e njëjta situatë.

"Brenda banesës më bëri dëme. Po ashtu nja dy kuintalë grurë që kisha këtu, misri iku në lumë, motorsekën e dëmtoi, një biçikletë e një peshore me bateri. Keq e përjetuam, sa mos na ndodhtë ndonjëherë, uji e zjarri s'ka më keq."

Në Voskop ka pasur dalje të lumit në dy prej urave të këtij fshati, ndërsa falë ndërhyrjes së vetë banorëve dhe emergjencave situata sot është normalizuar./ CNA





Lajmet e fundit nga