Përjashtimi i gazetarëve nga konferenca/ Shoqata e Gazetarëve Profesionistë, kritika të ashpra Ramës

13 Mars 2026, 18:46, Aktualitet CNA

Përjashtimi i gazetarëve nga konferenca/ Shoqata e Gazetarëve

Shoqata e Gazetarëve Profesionistë të Shqipërisë ka shprehur shqetësimin e saj për sjelljen e kryeministrit Edi Rama ndaj gazetarëve gjatë konferencës për shtyp të ditës së sotme. Sipas Shoqatës, përdorimi i gjuhës intimiduese dhe etiketuese, si dhe veprimi i nxjerrjes jashtë sallës i dy gazetarëve Ambrozia Meta nga Syri TV dhe Isa Myzyraj nga Report TV përbën një akt të qartë të përdorimit të forcës së pushtetit kundër mediave.

Shoqata thekson se aksesi i gazetarëve në informacionin publik nuk është privilegj, por një e drejtë themelore që garanton transparencën dhe funksionimin e demokracisë parlamentare.

Në deklaratë, shoqata i kërkon kryeministrit Rama të tregojë vetëpërmbajtje dhe të respektojë rolin e medias si pushteti i katërt dhe si zë i interesit publik.

“Çdo politikan, veçanërisht një kryeministër, ka detyrimin të jetë i përgjegjshëm dhe llogaridhënës përballë medias. Marrëdhënia mes pushteteve dhe medias nuk është çështje preference personale, por bashkëjetesë e domosdoshme e rregulluar në Kushtetutë”, thuhet në deklaratën e Shoqatës.

Shoqata e Gazetarëve Profesionistë të Shqipërisë shpreh sërish shqetësimin për sjelljen bullizuese të kryeministrit Edi Rama me gazetarët teksa i bëjnë pyetje, një situatë që u përsërit edhe gjatë konferencës së sotme për shtyp.

Gjuha intimiduese dhe etiketuese e përdorur nga kryeministri u përshkallëzua ditën e sotme, me një akt force, nxjerrjen jashtë konferencës për shtyp të dy gazetarëve, Ambrozia Meta e Syri TV, të cilës i bëri të ditur se do të përjashtohej përgjithmonë nga konferencat e tij, si dhe gazetarit Isa Myzyraj i Report TV, që u nxor jashtë nga salla. Shembulli i forcës së pushtetit që tregoi kryeministri ndaj gazetarëve, duke u kufizuar aksesin në informacionin publik, ishte prova se si z. Rama e koncepton marrëdhënien me median. Aksesi i gazetarëve në informacionin publik nuk është privilegj, por një e drejtë thelbësore, që garanton transparencën dhe funksionimin e demokracisë parlamentare.

Shoqata e Gazetarëve Profesionistë të Shqipërisë e dënon këtë sjellje të kryeministrit ndaj gazetarëve dhe i bën thirrje atij të tregojë vetëpërmbajtje dhe të respektojë rolin e medias, si pushteti i katërt dhe si zë i interesit publik. Çdo politikan, veçanërisht një kryeministër, ka detyrimin të jetë i përgjegjshëm dhe llogaridhënës përballë medias.

Në një shoqëri demokratike, marrëdhënia mes pushteteve, përfshirë atë mes ekzekutivit dhe medias, nuk është çështje preference personale, por një bashkëjetesë e domosdoshme, e rregulluar në kushtetutë, ku secili ushtron rolin dhe përgjegjësinë e vet, duke respektuar detyrën e tjetrit”, thuhet në reagim./ CNA