Pas rrahjes nga gardianët, i dënuari u vet*vra në burgun e Reçit, prokuria merr të pandehur 6 policët

27 Qershor 2025, 18:31, Aktualitet Elton Qyno

Pas rrahjes nga gardianët, i dënuari u vet*vra në burgun e

Gjashtë punonjës të policisë së burgjeve që shërbenin në regjimin e brendshëm të burgut të Reçit në Shkodër, janë marrë të pandehur për një rast vetëvrasje, duke u akuzuar për veprën penale të Kryerjes së veprimeve arbitrare të kryer në formën e bashkëpunimit.

Dosja e tyre është dërguar në gjykatën e Shkodrës dhe pritet që në ditët në vijim 6 ish-gardianët të japin shpjegime para gjykatës lidhur me veprimet e tyre arbitrare të bëra në burgun e Reçit.

Sipas hetimeve Besmir Likaj, Elvis Bajrakurtaj, Fatmir Bushati, Indrit Duli, Senadi Bajrakurtaj, Fatjon Bajrakurti, rezulton të kenë rrahur në ambientet e një dhomë në burgun e Reçit, të dënuarin Edmond Piraniqi.

Si pasojë e dhunës të ushtruar dhe fyerjes ndaj tij, i dënuari 44-vjeçar Piraniqi, është vetëflijuar duke u vetëvarur me çarçaf në ambientet e qelisë së tij.

Ngjarja e rëndë ka ndodhur në 29 qershor 2024, ku fillimisht Piranaqi është gjendur nga punonjësit e policisë me shenja jete, duke u dërguar në spitalin e burgut.

Por edhe pas ndihmës mjekësore ai nuk ka mundur të mbijetojë, duke nderuar jetë.

Lidhur me këtë rast prokuroria e Shkodrës, ka nisur hetimet duke hapur dosjen penale me Nr.840 për akuzën e “Shkaktimit të vetëvrasjes” dhe “Kryerjes së veprimeve arbitrare” kryer në bashkëpunim.

Hetimet treguan se 6 policët kishin ushtruar dhunë fizike ndaj të dënuarit Piraniqi, e pas kësaj i dënuari për vjedhje nën tronditjen e fortë psikike është vetëvarur.

Në dosjen hetimore jepet një tablo e qartë mbi dinamikën se çfarë ka ndodhur duke theksuar se:

“...në 29 qershor 2024, rreth orës 21:20, Specialisti i Informacionit të IEVP Reç, Malësi e Madhe ka njoftuar Policinë Gjyqësore se i dënuari Edmond Piraniqi ishte gjetur në dhomën nr. 17, godina nr. 5, "Veçim", i varur me një çarçaf të lidhur rreth fytit, me këmbët që mbështeteshin në tokë...”.

Në këto kushte, ai është dërguar me urgjencë në Spitalin Rajonal Shkodër, me shenja jete.

Nga verifikimet ka rezultuar se në orën 20:48 ndaj këtij të dënuari ishte përpiluar një “Raport Incidenti” dhe ishte dërguar në "Veçim" nga grupi i sigurisë, pasi kishte debatuar me infermierët dhe një punonjës policie të rolit bazë, konkretisht, Altin Shabaj.

Për sqarimin e rrethanave lidhur me këtë ngjarje, nga Policia Gjyqësore janë kryer veprimet e para procedural, duke u pyetur në cilësinë e personit që ka dijeni për veprën penale Altin Shaba, i cili ka treguar mbi rrethanat e faktit të përshkruara më lart.

Ndër të tjera Altin Shaba ka deklaruar se i dënuari Edmond Piraniqi ka kundërshtuar shoqërimin e tij, ku është kapur nga krahët nga grupi i sigurisë, i pa prangosur dhe është futur tek dhoma nr.17.

Grupi i sigurimit ka qëndruar në dhomën nr. 11 për rreth 5-6 minuta. Altin Shaba, ka shpjeguar se kur është hapur dera Nr.11 ka vënë re që i dënuari Edmond Piraniqi, po e shoqëronin prej krahu në korridorin e observimit, për t'a dërguar në dhomën Nr. 17.

E ka pyetur Edmondin në i duhej diçka, pasi i është dukur i stresuar. Kur është afruar dhe ka parë derën e dhomës nr. 11 që është hapur, ka vënë re që dhoma ishte e ç’rregullt, si në batanije dhe çarçafët, ishin përtokë.

Shaba deklaron se ka dëgjuar vetëm fjalët nga i dënuari: "...nuk dua të shkoj në izolim....", ndërsa zhurma të tjera nuk ka dëgjuar, por di të thotë që dera ishte e mbyllur nga grupi i sigurisë./ Oranews.tv