E fundit!

09:23 Aktualitet

Shqipëria avancon në negociatat me BE-në, sot hap i ri drejt integrimit europian

Shqipëria shënon një tjetër moment të rëndësishëm në rrugë...

Nata e ndërrimit të viteve në Korçë/ Si u prit 2025 në “Parisin e vogël”

1 Janar 2025, 11:29, Aktualitet CNA

Nata e ndërrimit të viteve në Korçë/ Si u prit 2025

Korça ka qenë epiqendra e festimeve në këtë natë të ndërrimit të viteve. Me një atmosferë të mrekullueshme të cilën vetëm "Parisi i Vogël" mund ta përcjellë aq bukur dhe aq këndshëm.

Sheshi para katedrales dhe pedonales së qytetit u tejmbush nga korçarët dhe vizitorët të cilët shijuan spektaklin e hedhjes së fishekzjarreve, të organizuar nga bashkia e Korçës me kujdes të veçantë.

Për disa minuta radhazi, qielli u ndriçua e mori një tjetër pamje mahnitëse çka ka sjellë emocione të mëdha tek të gjithë qytetarët.

Këta të fundit tregojnë se atmosfera në Korçë është fantastike, ashtu si koha që kaluan në darkën familjare me njerëzit e tyre me të dashur. Nuk kanë munguar as urimet të shkëmbyera mes njëri tjetrit, ndërsa kanë uruar edhe nëpërmjet Cna Tv.

"Atmosfera në Korçë është fantastike. Fantastike ashtu siç është edhe Korça. Po e festojmë këtu mes dritash. Zgjodhëm me tim shoq të dilnim në shesh e ta festonim mes njerëzish. Do tju uroja gjithë shqiptarëve, në veçanti korçarëve, një vit sa më të mbarë me shëndet mbi të gjitha, lumturi e vetëm begati paçi në familjet e tyre."

"Gëzuar të gjithë vitin e ri, kalofshi sa më bukur. Paçi gjithmonë sukses në çdo aspekt tuajin."

Edhe qytetarë korçarë të cilët jetojnë prej vitesh në shtetin grek janë rikthyer në qytetin e tyre të lindjes për të festuar këtë natë të ndërrimit të viteve. Jo vetëm me familjet, por duke marrë edhe miq nga Greqia për tu treguar së në Korçë festohet shumë bukur.

"Ne kemi ardhur nga Greqia dhe do e bëjmë vitin e ri këtu në Korçë. Jemi nga Korça, pse mos vinim? Është viti i dytë që vijmë dhe i festojmë këtu. Shumë bukur e kemi kaluar, festuam me familjen në restorant. Një vit të mbarë, shëndet. Të gjithë shqiptarët kudo që janë të kenë një vit të mbarë."

"Jam korçar, pothuajse vijmë çdo vit dhe është kënaqësi e madhe për ne që përveç shtetasve shqiptarë të vijnë të huaj e miq nga Greqia të cilët erdhën për të festuar këtu vitin e ri. Uroj nga zemra të gjithë shqiptarëve kudo në botë, gëzuar vitin e ri 2025!"

Nata e ndërrimit të viteve ka bërë që çdo restorant, bujtinë, ambjent akomodues të prenotohet plotësisht, ndërsa mesnata ka shënuar momentin më të bukur në qytet me spektaklin e fishekzjarreve. Në këtë vit të ri qytetarët përmes urimeve të tyre, janë lutur për një vit të mbarë e me shëndet e begati në çdo familje./ CNA