LEXO PA REKLAMA!

SHKARKO APP

Mirel Mërtiri, bosi real i inceneratorit Elbasan/ Mesazhet e plota që bindën SPAK

22 Maj 2023, 21:03, Aktualitet CNA

Mirel Mërtiri, bosi real i inceneratorit Elbasan/ Mesazhet e plota që

Mirel Mërtiri është konsideruar shpesh në media si “njeriu hije” i inceneratorëve. Emri i tij nuk figuronte në asnjë prej kompanive që siguruan kontratat qindra milionë euro për impiantet e përpunimit të mbetjeve në Elbasan, Fier dhe Tiranë.

Megjithatë, Struktura e Posaçme Anti-Korrupsion është i bindur se Mirel Mërtiri është, më së paku, pronari fakti i kompanisë “Albtek Energy”, shoqëria private që cila fitoi kontratën koncesionare për ndërtimin e landfillit dhe inceneratorit të Elbasanit, me vlerë mbi 22 milionë euro.

Kompania ishte në pronësi të bashkëjetueses së tij, Stela Gugallja. Për SPAK-un, pronari real është Mirel Mërtiri, për të cilin u kërkua 10 vjet burgim për akuzat e “korrupsionit aktiv të zyrtarëve të lartë” dhe “pastrim të produkteve të veprës penale”.

Bindja e prokurorëve të posaçëm mbi rolin lider të Mirel Mërtirit është krijuar, pasi kanë siguruar një dyzinë komunikimesh elektronike mes tij dhe personave të tjerë të lidhur me kompanitë e inceneratorëve.

“Nga këto komunikime provohet se i pandehuri Mirel Mërtiri është personi që drejton punët e shoqërisë “Albtek Energy” sh.p.k si dhe është personi që në të vërtetë ka kompetencat vendimarrëse në këtë shoqëri tregtare dhe njihet nga personat e tjerë si drejtuesi dhe përfaqësuesi i kësaj shoqërie”, thuhet në dosjen e SPAK-ut, të parë nga “Boldnews.al”.

Kush është shefi real?

Në vijim renditen disa prej gjetjeve kryesore të SPAK-ut për rolin e Mirel Mërtirit në kompaninë “Albtek Energy”.

– Gjatë hetimeve është administruar kontrata e datës 27.11.2014 midis shoqërisë “Albtek Energy” sh.p.k dhe shoqërisë “Energy Recuperator” s.p.a, me seli në Itali, me përfaqësues Ernesto Granelli, që ka për objekt ndërtimin “me çelësa në dorë” të “Inceneratorit me fuqi elektrike”, në Elbasan.

Në këtë kontratë, e cila është në gjuhën italiane, por është përkthyer gjatë hetimeve edhe në gjuhën shqipe, konstatohet se është shkruajtur emrin i palës kontraktore, shoqëria “Albtek Energy” sh.p.k dhe më pas është vendosur adresa e postës elektronike të shoqërisë “[email protected]”, që i përket të pandehurit Mirel Mërtiri.

Mirel Mërtiri, bosi real i inceneratorit Elbasan/ Mesazhet e plota që
Fotomontazh - Mirel Mërtiri dhe 3 inceneratorët

– Me proces verbalin e këqyrjes së të dhënave të datës 31.10.2022, me të cilin janë këqyrur të dhënat e nxjerra me aktin e ekspertimit nr.93 datë 21.04.2022, është gjetur nje e-mail i shtetasit Ilirjan Priftaj (inxhinier i ndërtimit në shoqërinë Albtek Energy sh.p.k), drejtuar të pandehurve Klodian Zoto dhe Mirel Mërtiri si dhe shtetasit Nardi Nallbani, i datës 26.05.2015. Bashkëngjitur këtij e-maili ndodhen dokumentet me emërtimin “Menazhim financiar për Albtek Energy” me zërat e punimeve në vlerën 16,000,000 Euro, si dhe dokumenti me emërtimin “Parashikim financiar për realizimin e punimeve”, që bën fjalë për të njëjtat punime si dokumenti i parë, por me çmime të ndryshme, ku çmimi në total është në shumën prej 21,661,000 Euro. I pyetur në lidhje me këtë e-mail shtetasi Ilirjan Priftaj ka shpjeguar se ia ka dërguar tre personave të mësipërm, pasi në dijeninë e tij ata kanë qënë drejtuesit e projektit për realizimin e kësaj kontrate.

SPAK: Mërtiri, rol drejtues

Nga këqyrja e të dhënave të nxjerra nga aktet e ekspertimit teknike kompjuterike, – thotë SPAK,- janë nxjerrë disa komunikime me anë të postës së elektronike të kryer nga i pandehuri Mirel Mërtiri me persona të tjerë, nga të cilat provohet roli i tij drejtues dhe zotërues në veprimtarinë e shoqërisë “Albtek Energy” sh.p.k.

Mirel Mërtiri, bosi real i inceneratorit Elbasan/ Mesazhet e plota që
SPAK

– Në datën 13.03.2016, i pandehuri Mirel Mërtiri i ka dërguar email të pandehurit Klodian Zoto, që lidhet me procesin e ndërtimit të kaldajës së inceneratorit të Elbasanit. Bashkëngjitur është dërguar një e-mail tjetër nga ing. Ernesto Granelli, me përmbajtje të lidhur me procesin e punës në kantier. Në këtë e-mail i pandehuri Mirel Mërtiri i ka shkruar të pandehurit Klodian Zoto se: “Mirëdita, të lutem kthejini një përgjigje me shkrim këtij plerës që nuk mund ti pranojmë pasi janë me cinese. Ata duhet të mbyllin punën sipas cronoprogramit të ER në shkurt… Pyetje: kush Po gënjen ER apo ER.. Të vrasin veten… Ata me sa me poshte shkruan ER nuk futen ose nese duan te futen gjoba eshte 5000 euro dita per çdo dite vonese nga data 1 mars…. Kthejini përgjigje sa më parë… Ditë të mbarë”.

Në datën 14.12.2016 i pandehuri Mirel Mërtiri i ka dërguar e-mail të pandehurit Klodian Zoto, me përmbajtjen “Ok… nise”. Ky e-mail del se është një përgjigje për një e-mail tjetër të mëparshëm të të pandehurit Klodian Zoto, i cili nga ana e tij ka dërguar një shkresë në formë drafti, të panënshkruar, të përgatitur në emër dhe llogari të shoqërisë “Integrated Technology Services”, përfaqësuar nga Klodian Zoto, që i drejtohet Bankës Veneto, ku përshkruhet se kjo shoqëri shpreh vullnetin e mirë për zgjidhjen e një situate të komplikuar që ka me Bankën Veneto.

Mirel Mërtiri, bosi real i inceneratorit Elbasan/ Mesazhet e plota që
Klodian Zoto

Në datën 19.12.2016 të pandehurit Mirel Mërtiri i është dërguar një e-mail nga shoqëria “De Mare” s.r.l, administrator Fausto De Mare, ku në mënyrë paralele e-maili iu është dërguar edhe të pandehurit Klodian Zoto dhe Sevi Zani, me përmbajtjen: “Për Albtek Energy sh.p.k, në vëmëndje të Z.Mirel Mërtiri, për dijeni të av.Klodian Zoto, për dijeni të Sevi Zani. Mirel mirëdita, bashkëlidhur po dërgoj sa më lartë në objekt. Do të isha shumë i lumtur të më dërgoje, sa më parë, garancinë bankare……”. Bashkë me këtë e-mail janë dërguar edhe disa dokumente, ku ndodhet drafti për garanci bankare nga shoqëria Albtek Energy, si dhe fatura nga shoqëria De Mare.

Në datën 17.03.2017 personi me emrin Julia Muça, e identifikuar si specialiste finance, i ka dërguar e-mail të pandehurit Mirel Mërtiri, në të cilin shkruan se: “Ju lutem më poshtë po ju nis disa pagesa si më urgjente, në rast mospagimi mund të sjellin problematika:”, ku përshkruhen edhe pagesat që duhen kryer, në total në shumën 1,949,664 lekë. Në vijim, në e-mail përshkruhet se: “Gjëndje ITW 950,000 lekë; gjëndje ALB 10,000,000; gjëndje ITS 180,000; gjëndje arke Zoto 1,490,000 lekë”. Në përmbajtjen e emailit shoqëritë janë përshkruar me iniciale, ku me ITW kuptohet Integrated Technology Waste, me ALB kuptohet shoqëria Albtek Energy, me ITS kuptohet Integrated Technology Services. Po në datë 17.03.2017 i pandehuri Mirel Mërtiri, e-mailin e mësipërm të marrë nga shtetasja Julia Muça ia dërgon të pandehurit Klodian Zoto, ku i shkruan si vijon: “Zoto të lutem të bëhen nga ato që do të nisë Elbasani sot. Ditë të mbarë”.

– Në datën 23.03.2017 shtetasja Julia Muça i ka dërguar të pandehurit Mirel Mërtiri e-mailin me përmbajtjen: “Përshëndetje, Isufi ka nevojë për gjëndje, mund të më konfirmoni vlerën ju lutem, FLM, gjëndja këtu është 150,000”. I pandehuri Mirel Mërtiri është përgjigjur duke i shkruar se: “Jepini sa i duhen”.

- Në datën 13.05.2017 personi me emrin Klevis Dine i ka dërguar e-mail shtetase Julia Muça, si dhe të pandehurës Stela Gugallja, në të cilin i informon se në datën 13.05.2017 roja te porta e landfillit është gjetur në gjumë nga operatorët e natës dhe se është konfrontuar me ta. Më tej shkruan se duhet t’i hiqet dita e punës për datën 13 maj. E-maili është dërguar nga Julia Muca te i pandehuri Mirel Mërtiri, i cili është përgjigjur se: “T’i hiqen tre ditë punë dhe jo vetëm një… Biles po ia bëj unë njoftimin nesër… Thuaj cunave të ma kujtojnë nesër në mengjes”.

Mirel Mërtiri, bosi real i inceneratorit Elbasan/ Mesazhet e plota që
Fotomontazh - Mirel Mërtiri

– Në datën 17.05.2017 i pandehuri Mirel Mërtiri i dërgon e-mail të pandehurit Klodian Zoto, si dhe shtetasve Sevi Zani dhe Helada Papa. Bashkëngjitur ndodhet e-maili i dërguar me personi me emrin Andrea drejtuar të pandehurit Mirel Mërtiri, në të cilin është përcjellë një dokument në formë drafti. I pandehuri Mirel Mërtiri i ka shkruar të pandehurit Klodian Zoto si vijon: “Mirëmëngjes, Klodi dhe goca ju lutem lexojeni dhe në një fletë të më dërgoni atë cfarë duhet korrektuar…”.

– Në datën 21.07.2017 i pandehuri Mirel Mërtiri i ka dërguar një email të pandehurit Klodian Zoto, që lidhet me procesin e ndërtimit të inceneratorit të Elbasanit. Bashkëngjitur ndodhet një e-mail tjetër që i është dërguar të pandehurit Mirel Mërtiri në datën 20.07.2017, në gjuhën italiane që gjatë hetimeve është përkthyer në gjuhën shqipe, në të cilin parashtrohen problematika në lidhje me programin e punimeve. I pandehuri Mirel Mërtiri i ka shkruar të pandehurit Klodian Zoto si vijon: “A janë në rregull keta plehrat??? Ju lutem një përgjigje shumë të Fortë sot dhe paralajmëroni PW që ndërprisni çdo marrëdhënie deri në rregullimin e të gjithë problematikave që ka EL ….”.

– Në datën 26.07.2018 i pandehuri Mirel Mërtiri ka marrë një e-mail nga shtetasi Elton Bualli me adresë “[email protected]”, i cili i ka shpjeguar se, është kontaktuar nga një inspektor mjedisi, i cili së bashku me AKU-në kishin nevojë që të depozitonin pranë landfillit Elbasan mbetje shtazore dhe e pyet të pandehurin se si duhet që të veprojnë. I pandehuri Mirel Mërtiri i përgjigjet që: “Mos i pranoni në asnjë mënyrë, ose të jetë 80 euro Toni, që të keni mundësinë të mbyllni kostot për argjilën e gjithë punët e tjera që duhen bërë… Për mua mos i pranoni”. Kjo përgjigje iu është dërguar për dijeni edhe të pandehurve Klodian Zoto dhe Stela Gugallja.

Mirel Mërtiri, bosi real i inceneratorit Elbasan/ Mesazhet e plota që
Fotomontazh - Stela Gugallja dhe Klodian Zoto

Nga këqyrja e të dhënave të nxjerra nga akti i ekspertimit teknik nr.66 datë 03.03.2022, këqyrur me proces verbalin e datës 14.10.2022, ka rezultuar se janë gjetur të ruajtura në tabletin e të pandehurit Klodian Zoto të dhëna në lidhje me veprimet financiare, ndër të tjera edhe të shoqërisë “Albtek Energy” sh.p.k. Nga këqyrja janë nxjerrë të dhëna për gjëndjen e arkës së kësaj shoqërie, ku janë shënuar dalje të të ardhurave dhe tërheqje të shumave monetare nga i pandehuri Mirel Mërtiri.

Sipas SPAK-ut, të gjitha komunikimet dhe veprimet e mësipërme lidhen me veprimtarinë e shoqërisë “Albtek Energy” sh.p.k, ku i pandehuri Mirel Mërtiri nuk rezulton se ka pasur ndonjë marrëdhënie punësimi. Por, nga këto komunikime provohet se i pandehuri Mirel Mërtiri është personi që drejton punët e shoqërisë “Albtek Energy” sh.p.k si dhe është personi që në të vërtetë ka kompetencat vendimarrëse në këtë shoqëri tregtare dhe njihet nga personat e tjerë si drejtuesi dhe përfaqësuesi i kësaj shoqërie./ Boldnews

Lajmet e fundit nga