Mesazhi i Fortlumturisë së Tij: Çdo njeri është krijuar sipas ikonës së Perëndisë dhe secili e ka këtë ikonë brenda tij

5 Tetor 2025, 10:27, Aktualitet CNA

Mesazhi i Fortlumturisë së Tij: Çdo njeri është

Kryepsikopi i Tiranës, Durrësit dhe gjithë Shqipërisë, Joani ka mbajtur predikimin e tij gjatë Liturgjisë Hyjnore në katedralen “Ngjallja e Krishtit” në Tiranë.

Fortlumturia e Tij gjatë fjalës së mbajtur dha mesazhe të rëndësishme për njerëzimin dhe për dashurinë ndaj Zotit.

Kryepsikopi tha se çdo njeri është krijuar sipas ikonës së perëndisë dhe çdokush nga ne ka këtë ikonë brenda tij.

Fortlumturia e Tij u shpreh se nëse ne do të fillojmë të pastrojmë zemrën do t’i duam të gjithë njerëzit, ashtu siç Zoti i do të gjithë.

Dashuria e vërtetë, tha Fortlumturia e Tij, nuk mund të jetë e coptuar, ai që do i do të gjithë.

“Duke ndjekur mësimin e Zotit ne mësojmë rrugën e vërtetë drejt Perëndisë. Nuk mjafton vetëm t’i dëgjojmë por dhe t’i zbatojmë. Zoti thotë se nëse doni ata që ju duan dhe mëkatarët bëjnë të njëjtën gjë. Çfarë hiri keni? Zoti thotë doni armiqtë tusaj dhe do të quheni biri i Të Lartit. Nëse nuk pastohet zemra nuk mund t’i duam të tjerët. Jo vetëm armiqtë, por as miqtë. Çdo njeri është krijuar sipas ikonës së Perëndisë dhe çdonjeri e ka këtë ikonë brenda tij.

Ne nuk jemi as më të mençur se Zoti as nuk kmei dashuri më të madhe se Zoti. Përse Zoti i do të gjithë? Sepse Zoti sheh brenda nesh ikonën. Nëse do të fillojmë të pastrohemi, do të fillojmë t’i duam njerëzit e tjerë. Nëse do të duam dhe armiqtë tanë do të bëhemi të ngjashëm me Perëndinë. Dashuria në shpirt nuk mund të jetë e coptuar. Ai që do i do të gjithë. Veten tonë e falim shumë shpejt ndërsa të tjerët jo. Shenjtorët falin me shumë lehtësi sepse zemra e tyre është e pastër. Është tjetër qortimi i Zotit dhe tjetër t’i urresh njerëzit e tjerë. Nëse i duam do t’i qortojmë me shumë dashuri.

Të gjithë ne jemi mëkatarë. Vetëm duke pasur dritën e fjalëve të Perëndisë ne mund të ndriçohemi. Vetëm këto fjalë mund të na japin jetën e vërtetë dhe plot dritë”, tha Fortlumturia e Tij, Joani./CNA