Mblidhen Emergjencat Civile në Korçë/ Masat për sezonin dimëror

14 Nëntor 2024, 15:30, Aktualitet CNA

Mblidhen Emergjencat Civile në Korçë/ Masat për sezonin

Drejtori i Përgjithshëm tek AKMC, Haki Çako, ka zhvilluar një takim në qytetin e Korçës për masat që do të merren këtë sezon dimri.

Çako tha se ka bërë thirrje në të gjitha bashkitë për të aplikuar me projekte konkrete, drejtpërdrejt për të financuar për investime në infrastrukturën e zvogëlimit të riskut nga fatkeqësitë natyrore.

“Takimi i Komisionit të Mbrojtjes Civile në qarkun e Korçës është në vazhdën e takimeve që kemi organizuar. Agjencia Kombëtare e Mbrojtjes Civile dhe Ministria e Mbrojtjes me vëmendjen dhe vlerësimin e ministrit të Mbrojtjes, Pirro Vëngu, në kuadër të masave që duhen marrë në menaxhimin e emergjencave civile në nivel kombëtar. Sot kemi zhvilluar këtë takim me Komisionin e Mbrojtjes Civile në Korçë.

Janë lançuar edhe një sërë thirrjesh që vijnë si risi për aplikim të projekteve nga njësitë e pushtetit vendor, bashkitë për t’u financuar nga programi i Emergjencave Civile pranë Ministrisë së Mbrojtjes dhe Agjencisë Kombëtare të Mbrojtjes Civile që konsistojnë kryesisht në parandalimin e fatkeqësive natyrore, por edhe në menaxhimin dhe rehabilitimin e tyre.

Në këtë kuadër ne kemi aplikuar ose kemi bërë thirrje në të gjitha bashkitë për të aplikuar me projekte konkrete, drejtpërdrejt për të financuar për investime në infrastrukturën e zvogëlimit të riskut nga fatkeqësitë natyrore.

Vjen risi edhe blerja e pajisjeve dhe mjeteve të specializuara drejtpërdrejt për Emergjencat Civile ashtu sikurse do të vazhdojë vlerësimi për projektet për rehabilitimin e digave, për urat bel dhe për të gjitha nevojat e tjera të Emergjencave Civile në njësitë e pushtetit vendor”, tha Çako.

Më tej Çako tha se qarku i Korçës është një nga qarqet me risk mesatar në lidhje me fatkeqësitë natyrore të zjarreve, po ashtu dhe një sërë problematikash të tjera që lidhen si rreziqet e bllokimit të rrugës nga dëbora dhe të rrëshqitjes nga dherat dhe ortekët.

“Qarku i Korçës është nga qarqet që është me risk mesatar në lidhje me fatkeqësitë natyrore të zjarreve. Ky vit që shkoi natyrisht ishte një vit që pati përmasa në shkallë vendi dhe Korça pati dy-tri raste zjarresh problematike që lidheshin në zonën e Prespës, por që u desh ndërhyrja nga të gjitha strukturat vendore dhe nga strukturat e nivelit qendror. Janë bërë analizat dhe vazhdojnë të dalin faktorët dhe shkaqet për të marrë masa në të ardhmen, për t’i paraprirë, për t’i parandaluar dhe menaxhuar në kohë pasojat që vijnë prej këtyre fatkeqësive. Qarku i Korçës natyrisht ka edhe një sërë problematikash të tjera që lidhen si rreziqet e bllokimit të rrugës nga dëbora dhe të rrëshqitjes nga dherat dhe ortekët. Në këtë kuadër është vënë theksi në rritjen e kapaciteteve teknike dhe në reagimin në kohë reale”, u shpreh ai.

Sa i takon menaxhimit të fondeve, pothuajse të gjitha bashkitë pretendojnë që janë në proces. Çako shpreson që deri në fund të vitit të jenë të realizuara të gjitha fondet që janë vënë në dispozicion në çdo bashki.

“Tani u diskutua dhe u tërhoq sigurisht vëmendja për një angazhim maksimal për të shfrytëzuar të gjitha fondet që vihen në dispozicion nga programi i Emergjencave Civile. Pothuajse të gjitha bashkitë pretendojnë që janë në proces, shpresojmë që deri në fund të vitit të jenë të realizuara të gjitha fondet që janë venë në dispozicion në çdo bashki”, theksoi Çako./ CNA