Mbledhja me rektorët e universiteteve/ Rama: Duhet rishikuar ligji për arsimin e lartë

15 Janar 2026, 14:54, Aktualitet CNA

Mbledhja me rektorët e universiteteve/ Rama: Duhet rishikuar ligji për

Kryeministri Edi Rama ka zhvilluar ditën e sotme një takim me 40 rektorët e universiteteve publike dhe private. Gjatë fjalës së tij, Rama u shpreh se duhet rishikuar ligji për arsimin e lartë. Sipas tij, kjo do të jetë e mundur të bëhet në një kohë të arsyeshme pa pritur sesionin tjetër parlamentar.

“Dua të prek disa pika që në këndvështrimin tim janë me rëndësi. Duke vlerësuar sinqerisht bashkëpunimin që kemi ndërtuar dhe vijimësinë e komunikimit në një rruga sa institucionale aq edhe të hapur informale, gjë që na ka dhënë mundësinë të jemi në kontakt me njëri-tjetrin dhe të kuptojmë më shumë, është koha për të rivizituar ligjin e arsimit të lartë. Ka kaluar një periudhë e mjaftueshme për të reflektuar ndryshimet që ka sjellë koha. Fatmirësisht kemi një praktikë të mirë, ligji aktual është shkruar në bashkëpunim me ju me kontributin tuaj, ndaj ky do të jetë rasti përsëri. Shpresoj dhe besoj edhe për shkak të eksperiencës, edhe për shkak se këtë herë bëhet fjalë për korrektime, do të jetë e mundur ta bëjmë këtë në një kohë të arsyeshme dhe nuk do të presim sesionin tjetër të parlamentit për bazën e ndryshimeve. Me rëndësi është të organizohemi me një grup pune për të shkruar ndryshimet”, tha kryeministri.

Më tej kreu i qeverisë u shpreh se aktualisht Universiteti i Tiranës është në krye të një vargu universitetesh që kanë rritur kapacitetin e tyre financues jashtë buxhetit të shtetit.

“Ka ndodhur një ndryshim i rëndësishëm në qasjen e universitetit. Në qasjen drejt financimit. Sot Universiteti i Tiranës është në krye të një vargu universitetesh që kanë rritur kapacitetin e tyre financues jashtë buxhetit të shtetit. E kanë arritur këtë duke ngritur skuadra dhe duke lidhur partneritete europiane. E duke përfituar fonde europiane. Unë do të doja që në takimin e ardhshëm të mblidheshim për të diskutuar hapur këtë proces. Doja të ftonim edhe rektorët e universiteteve private. Sfida është hajde t’i riorganizojmë në një sistëm më kompetitiv. Universiteti është aleati më i rëndësishëm i institucioneve të vendit. Na duhet që ta vlerësojmë më shumë këtë kapacitet”, u shpreh Rama. /CNA