Mbi 2 orë në Kapshticë/ Drejtuesit e kamionëve dhe autobusëve reagojnë të shqetësuar

13 Janar 2025, 14:26, Aktualitet CNA

Ndonëse prej ditës së djeshme u njoftua që mjetet e tonazhit të rëndë si kamionat dhe autobusët nuk do të lejohen të kalojnë nga kjo pikë kufitare drejt Greqisë për shkak të situatës së krijuar nga reshjet e borës, në doganën e Kapshticës ka patur një sërë kamionash e autobuzash që kanë pritur prej më shumë se 2 orësh dhe vijojnë të qëndrojnë aty për të kaluar kufirin.

Udhëtarë të shumtë po qëndrojnë për orë të tëra në pritje të palës greke për të dhënë një njoftim të dytë e për t’i lejuar të kalojnë drejt shtetit grek, ndërsa temperaturat e ulëta e bëjnë më të vështirë pritjen e tyre pranë doganës.

Vetë udhëtarët kanë treguar se nuk kanë patur informacion se nuk do të lejoheshin autobuzët ndërsa kërkojnë ndihmën e mediave dhe reagimin e shpejtë të palës greke për ti lejuar ata të kalojnë.

"Ne jemi nisur në orën 9 nga Bilishti, si orare të zakonshme. Erdhëm këtu po presim një urdhër të dytë, të marrin vendim andej çdo bëhet, se është zënë rruga apo ka problem tjetër nuk e dimë. Që andej makinat vijnë, që këtu nuk shkojnë. Kush na tha ne? Kam prerë biletën kam 3 ditë, sot prisja të vinte ora e të iknim."

"Kemi gati 2 orë po presim. E kanë mbyllur doganën, tani vajtën shoferët pyetën dhe presin urdhër të dytë derisa të hapet rruga. S’kemi çtë bëjmë. Kam familjen në Greqi. Jo nuk dinim gjë, s’na kanë lajmëruar se po ta dinim skemi pse të rrimë këtu në mes të të ftohtit e dëborës. Nuk e di çfarë zgjidhje do t’i japin."

"Kemi që në mëngjes po presim dhe e kemi me patjetër të arrijmë se kemi punë. Të ishim marrë vesh që të iknim me taxi të vogël. S’mund të rrimë, mbetëm këtu. Na ndihmoni se jemi gra e vetëm dhe duhet të ikim."

Sipas informacioneve të marra nga Cna, shkak për kufizimet në këtë doganë është bërë dëbora e shumtë në Grevena, qytet jo shumë larg nga dogana e Kapshticës. Autoritetet greke po punojnë në aksin Doganë Kapshticë - Grevena për hapjen e rrugës ndërsa pritet që të hapet edhe kalimi për autobuzët e kamionat. Situata mbetet alarmante për shkak të temperaturave të ulëta çka kanë sjellë vështirësi edhe në pritjen e udhëtarëve./ CNA