Mbajtja e Samitit të NATO-s në Tiranë/ Hoxha, takim me zëvendëssekretaren e Përgjithshme të Aleancës

18 Prill 2026, 17:21, Aktualitet CNA

Mbajtja e Samitit të NATO-s në Tiranë/ Hoxha, takim me

Ministri i Jashtëm, Ferit Hoxha ka zhviluar një takim me zëvendëssekretaren e Përgjithshme të NATO-s, Radmila Shekerinska në prag të Samitit të Ankarasë.

Në një postim në “X”, Hoxha shkruan gjatë takimit është diskutuar mbi angazhimin e Shqipërisë ndaj Aleancës, mbështetjen për Ukrainën, situatën e sigurisë në rajon dhe përgatitjet për organizimin e samitit të ardhshëm të NATO-së në Tiranë.

Ministri shprehet gjithashtu se gjatë takimit ka theksuar mbështetjen e Shqipërisë për KFOR-in dhe rolin e tij thelbësor në garantimin e sigurisë në Kosovë dhe në rajon.

Postimi i plotë:

Sot zhvillova një takim produktiv me Radmila Shekerinska, Zëvendës Sekretare e Përgjithshme e NATO-s. Gjatë takimit diskutuam mbi angazhimin e palëkundur të Shqipërisë ndaj Aleancës, mbështetjen e vazhdueshme për Ukrainën, situatën e sigurisë në Ballkanin Perëndimor, si dhe përgatitjet e Shqipërisë për organizimin e Samitit të ardhshëm të NATO-s në Tiranë.

Konfirmova linjëzimin e plotë të Shqipërisë me prioritetet e NATO-s në prag të Samitit të Ankarasë. Shqipëria mbetet një aleate e vendosur, duke vijuar modernizimin e Forcave të Armatosura, rritjen e shpenzimeve për mbrojtjen në vitin 2026, si dhe zhvillimin e industrisë vendase të mbrojtjes përmes investimeve strategjike dhe partneriteteve afatgjata.

Gjithashtu, prezantova përgatitjet e Shqipërisë për të pritur Samitin e ardhshëm të NATO-s në Tiranë, i pari i këtij niveli në rajonin tonë, duke vënë në dukje koordinimin e vazhdueshëm me selinë e NATO-s dhe angazhimin tonë për të garantuar një Samit të suksesshëm dhe me ndikim të rëndësishëm.

Sa i përket Ballkanit Perëndimor, nënvizuam rëndësinë e angazhimit të qëndrueshëm të NATO-s për ruajtjen e stabilitetit rajonal dhe adresimin e sfidave të reja të sigurisë. Po ashtu, rikonfirmova mbështetjen e fortë të Shqipërisë për KFOR-in, duke theksuar rolin e tij thelbësor në garantimin e sigurisë në Kosovë dhe në rajon, si dhe rëndësinë e ruajtjes së një pranie të fuqishme të NATO-s, të bazuar në kushtet e sigurisë. /CNA