Mashtrimi me kreditë/ Banka e Shqipërisë heq licencat e “Micro Credit Albania” dhe “Final”

23 Maj 2024, 22:02, Aktualitet CNA

Banka e Shqipërisë ka revokuar këtë të enjte licencat e dy subjekteve financiare “Final” sh.p.k. dhe “Micro Credit Albania” sh.p.k. Kësaj të fundit i ishte pezulluar licenca në fund të muajit dhjetor të vitit 2023.

Vendimi është marrë nga Guvernatori i Bankës së Shqipërisë, Gent Sejko.

Banka e Shqipërisë thotë se “Final” dhe “Micro Credit Albania” nuk vazhdojnë të plotësojnë më kushtet në bazë të të cilave janë licencuar.

Sipas saj, ortakët e dy subjekteve financiare nuk plotësojnë më kriterin e reputacionit të lartë etik, pasi kanë masë arresti nga Gjykata e Tiranës.

“Nëpërmjet këtij njoftimi, ju bëjmë me dije se Banka e Shqipërisë, sot, më datë 23.5.2024, ka marrë vendim për revokimin e licencave të dy subjekteve financiare jobanka, përkatësisht licencën nr. 11, datë 20.2.2009 të shoqërisë “Final” sh.p.k. dhe licencën nr. 38 datë 9.5.2016 të shoqërisë “Micro Credit Albania” sh.p.k., tashmë e pezulluar me vendimin nr. 644, datë 6.2.2024.

Vendimmarrja e Bankës së Shqipërisë bazohet në dispozitat ligjore dhe rregullative në fuqi që rregullojnë veprimtarinë e subjekteve financiare jobanka, të cilat parashikojnë, ndër të tjera, rastet e revokimeve të licencave kur subjektet e licencuara nuk vazhdojnë të plotësojnë më kushtet në bazë të të cilave janë licencuar.

Në rastet e sipërcituara, për ortakët e të dy shoqërive që u është revokuar licenca, me kërkesën e Prokurorisë është vendosur masa e arrestit nga Gjykata e Shkallës së Parë, Tiranë, dhe jemi në kushtet kur ata nuk plotësojnë më kriterin e reputacionit të lartë etik, i cili ndër të tjera konsideron që individi të mos jetë në ndjekje penale, në gjykim për vepra penale dhe i dënuar penalisht.

Investigimi/ Si i mashtrojnë shqiptarët ‘Ritello’ dhe ‘Microcredit’
17 Prill, 13:32

Gjithashtu, Banka e Shqipërisë po adreson kuadrin ligjor dhe rregullativ lidhur me administrimin në vijimësi të portofolit të klientëve të shoqërive “Final” dhe “Micro Credit Albania”.

Banka e Shqipërisë do të dalë me një njoftim të dytë për të dhënë sqarime të plota për të gjithë klientët e interesuar se si do të trajtohen në vijimësi portofolet e kredive të këtyre dy subjekteve”, thuhet në njoftimin e Bankës së Shqipërisë.

CNA ka denoncuar më herët skemën e mashtrimit me kredidhënien nga shoqëritë mikrofinanciare.

Skema është përdoruar tek kredimarrës të ndryshëm, të cilët rezultojnë të jenë viktima të vjedhjes së pasurisë së tyre, duke shkaktuar një dëm shumë të lartë ekonomik ndaj këtyre shtetasve apo enteve private dhe publike./ CNA