30 mijë nxënës më pak se një vit më parë/ Ministrja Kushi hesht për boshatisjen e shkollave

12 Shtator 2022, 09:38, Aktualitet CNA

30 mijë nxënës më pak se një vit më parë/

Ministrja e Arsimit, Evis Kushi, në Kongresin e Arsimit, ka folur për sfidat në arsim.

Gjatë fjalës, ministrja tha se sfida më e madhe në arsim është rritja e arsimit në standardet e BE-së.

Gjithashtu, Kushi preku fenomenin e largimit të të rinjve nga rajoni për të studiuar jashtë duke thënë se për t'iu përgjigjur kësaj tendence kanë bërë ndërkombëtarizimin e universiteteve, por edhe struktura europiane ekselence.

Këtë vit, janë futur në bankat e shkollës 450 mijë nxënës në total në të gjithë vendin, rreth 30 mijë më pak, krahasuar me një vit më parë, por për këtë çështje, Kushi nuk ka thënë asnjë fjalë.

“Kongresi i Arsimit përkon dhe me fillimin e vitit të ri shkollor dhe dua ta nis me urim për nxënësit e mësuesit për një vit shkollor të mbarë e të suksesshëm. Arsimi përveçse një e drejtë themelore, është edhe faktori kryesor për zhvillimin ekonomik dhe shoqëror të çdo kombi.

Nuk ka asnjë dyshim që për arsimin duhet solidaritet i madh kombëtar. Në kohë sfidash e transformimesh, arsimi duhet të jetë në krye të çdo axhende. Edhe qëllimi i Kongresit është të bëjë bashkë shumë aktorë, përfshirë parauniversitar, të lartë, kërkimin shkencor, pedagogë, mësues e studiues për të nxitur bashkëpunimin për sfidat e së ardhmes për një arsim cilësor drejt BE-së.

Një pjesë e të rinjve largohen nga rajoni për studime, veçanërisht për mjekët dhe infermierët. Për t’iu përgjigjur kësaj tendence ne kemi bërë ndërkombëtarizimin e universiteteve, por edhe struktura europiane ekselence. Qëllimi ynë është të rrisim cilësinë. Një politikë tjetër është përcaktimi i programeve të studimit prioritet kombëtar.

A mjaftojnë këto politika? Të gjithë biem dakord që politikat dhe reformat, sa më të mëdha e të thella të jenë, aq më shumë kohë kërkojnë se rezultatet nuk janë të menjëhershme. Kemi përgatitur disa programe: për programe të përbashkëta të dyfishta me universitete europiane, si dhe qendra kërkimore, me qëllim për t’u dhënë vlerë diplomave tona. Politikë tjetër: bursat e studimit për progamet prioritare, me kushtin që studentët pas studimeve të qëndrojnë në vendin tonë.

Besoj që në panelet e kongresit, kjo temë do të ketë diskutim të gjerë”, tha Kushi./ CNA.al