web counter
LEXO PA REKLAMA!

SHKARKO APP

App Store
Google Play

Kush fle në prokurori mbi dosjen e Irfan Hysenbelliut?

26 Mars 2026, 14:23, Aktualitet REDAKSIONALE

Biznesmeni Irfan Hysenbelliu, një nga njerëzit që urren të paguajë taksat, pati një përplasje të madhe me zyrtarët e shtetit kohë më parë. Nuk paguante taksat dhe nervozohej pse shteti i çonte dokumenta zyrtare që të shlyente detyrimet. 

E quajti një sulm të bërë nga Tatimet, përplasje personale me ish-kreun e atij institucioni, Ceno Klosi. Më pas akuzoi ish-zëvendëskryeministren dhe ish-ministren e Infrastrukturës, Belinda Ballukun, për luftëra personale.

Në fakt, që në hyrje duket sa burrë është Irfani, pasi nuk ka kurajën të thotë që përplasjen se ka pasur as me kryeministrin Rama, se nuk besojmë që Irfani ende shikon ëndrrat apo beson fjalët e Pal Vatës, se ai dhe Enveri s'dinin gjë, e kishte bërë Mehmeti me kokën e vet. Por këtu duket dhe karakteri i këtij biznesmeni, por kjo i përket një pjese tjetër. Ai nuk paguante taksat fajin ja kishte shteti, pse? 

Sot çështja është në një procedurë ligjore, pra në prokurori.

Çfarë ka dosja?

Dosja e prokurorisë ka një material shumë të thjeshtë pas një kontrolli të bërë nga organet tatimore. Me një ndërtim përballë me “Birra Tirana”, në rreth 35 mijë metra katrorë, ku Irfan Hysenbelliu ishte pronar trualli apo investitor, janë gjetur dokumente noteriale, akte shitjeje për rreth 17 milionë euro pasuri të shitura.

Dhe për këto pasuri të shitura, Irfan Hysenbelliu nuk ka paguar dhe nuk ka deklaruar asnjë qindarkë në Tatime, në shtet.

Dhe ky material është marrë e çuar në prokurori.

Dosja fle në prokurori.

Në fakt, dosja duhet hetuar dhe duhej të hetohej me shpejtësi. E para, për të zbardhur të vërtetën. E dyta, që të mos ketë diferencë midis biznesmenëve.

Irfani është pronar televizioni dhe nuk paguante tatime e sigurime shoqërore në dhjetëra biznese të tjera. Dhe nga ana tjetër thoshte se ishte një sulm politik. Ky është biznemen apo spekullant? 

Çfarë sulmi politik?

Midis 2000 bizneseve që kishin borxhe pa paguar, detyrime tatimore, sigurime shoqërore, i vajti një letër edhe Irfanit. Por Irfani u “çmend”.

Filloi të ulëriste pse i kishte vajtur shkresa zyrtare nga Tatimet, ndërkohë që bizneseve të tjera u shkojnë muaj për muaj, ditë për ditë, u bllokojnë llogaritë bankare.

Por Irfanit nuk guxonte kush, se ky qe Fania i madh, i “News24”, i “Panoramës”. Me demek  "Berluskoni" shqiptar ky kapteri mediatik.

A e imagjinojnë dot shqiptarët që Fanes t’i çohet një dokument nga Tatimet “paguaj borxhet”?! Krim i madh populli duhet të protestojë.

Fania shpërtheu, akuzoi, sulmoi. Tatimet thjesht bënë detyrën, bënë kontrolle, zbatuan ligjin zbuluan thesare të fshehura ndaj shtetit. Thesare taksash të padeklaruara, të papaguara.

Kur kontrolluan te “Birra Tirana”, gjetën evazion fiskal. Kur kontrolluan te “Birra Korça”, kujtojmë këtu rastin kur kamioni dilte nga fabrika e "Birra Korçës", me faturë kishte rreth 50 arka, ndërkohë brenda ishin 100 arka me birrë. Evazion i pastër, ndërkohë që po kontrollohej nga tatimet e doganat vazhdonte abuzimet.

Nga ana tjetër Fania bërtiste “më ka faj shteti, po më sulmojnë Tatimet, po më vënë gjoba”. Aq shumë inat morri kapter Fania sa këkoi të prishte dhe Festën e Birrës në Korçë".

Askush nuk i ka vënë asnjë gjobë Irfanit. Irfani s'ka paguar taksat. E kanë kontrolluar si gjithë bizneset e tjera, i kanë rivlerësuar, i kanë llogaritur interesat. T’i paguajë në shtet ato që s’ka paguar dhe çdo gjë është e qetë dhe e thjeshtë.

Pse shpërthen Irfani për taksat që s’paguan?

“Irfani të mos paguajë taksat, të tjerët të paguajnë taksa”. Si do të bëjë biznesi konkurrencë? Si do të konkurrojë tjetri me Irfanin kur ky nuk paguan taksat?! Shteti s’do t'i marrë të ardhurat? Gazetarëve s’do t'ua paguajë sigurimet? 

Ndaj është shumë e thjeshtë.

Prokuroria duhet të hetojë me shpejtësi dosjen që ka për Irfan Hysenbelliun. Jo të flenë mbi të dhe ta bëjnë që të harrohet.

Ne do të jemi këtu dhe do ta kujtojmë ditë pas dite, që Prokuroria e Tiranës të mos flejë mbi dosjen e Irfan Hysenbelliut, sepse janë 17 milionë euro të faktuara me dokumente për shitje pronash të padeklaruara në shtet, pa paguar asnjë qindarkë te Tatimet.

Pa folur më tepër çfarë u gjet te “Birra Korça”, që kalonte kamioni dhe kishte mall më shumë sesa në faturë. Pa folur ç’është gjetur te “Birra Tirana” apo pa folur për sigurimet dhe tatimet në bizneset e Irfanit që s'i paguante kurrë, i vononte. Në fund u shpalli luftë institucioneve të shtetit. Pse? Thjesht se po bënin detyrën. Se kapter Fania nuk donte të paguante.

E që të kemi shtet, shteti duhet ta bëjë detyrën duke zbatuar ligjin, së pari me Irfanët, me shokët e tij dhe me këdo tjetër. Prokuroria duhet të hetojë shpejt dhe me cilësi pa pasur frikë nga Irfan Hysenbelliu, se del në “News24”, apo se sulmohesh, akuzohesh dhe anatemohesh nga mediat që ai i përdor si mitraloz për interesat e tij personale.

Prokuroria duhet të hetojë deri në fund për të treguar a kanë përgjegjësi penale kompanitë? A kanë bërë evazion fiskal?

Irfani duhet të detyrohet të paguajë çdo taksë që nuk u ka paguar shqiptarëve, çdo qindarkë. Në momentin që ekranin e përdor që të mos paguash tatime, taksa, të mos paguash sigurimet e gazetarëve, kryen krim vjedhje, shmangie e fshehje taksash nuk je media, as kazan por mbrojtës hajdutërish, mbrojtës krimi. 

Epoka e Irfan Hysenbellinjve që nuk paguajnë talsa duhet të marrë fund me hetimin e plotë të prokurorisë, me çuarjen e dosjes në gjykatë pa u ndalur asnjë çast, pa asnjë frikë, pa asnjë mëdyshje. Ligji dhe vetëm ligji.

Vetëm kështu vendoset shteti ligjor, vetëm kështu ka demokraci, vetëm kështu ka kapitalizëm, vetëm kështu shkohet në Europë.

Imagjinoni diku në Europë të mos paguajnë taksat biznesmenët dhe mediat e tyre të pëllasin siç pëllet ekrani i kapter Fanes, ditë e natë, thjesht dhe vetëm se i kanë kërkuar të paguajë taksat!/ CNA





Lajmet e fundit nga