Këshilltari rumun i Ramës, i akuzuar për korrupsion/ Akuzat për përfshirje në kartelin "Sinaloa"

16 Qershor 2024, 11:04, Aktualitet CNA

Këshilltari rumun i Ramës, i akuzuar për korrupsion/ Akuzat

Florian Coldea, foto e marrë nga mediat rumune

Këshilltari i Sigurisë së kryeministrit Edi Rama, Florian Coldea, po hetohet nga Drejtoria Kombëtare e Antikorrupsionit në Rumani për korrupsion.

Sipas mediave vendase, Coldea është marrë nën hetim në 24 maj, bazuar në njoftimin e prokurorisë rumune, ku akuzohet bashkë me 2 persona të tjerë se i kanë kërkuar një biznesmeni shumën prej 700,000 eurosh, për të ndikuar te disa magjistratë për disa çështje.

Nga ana tjetër zyra e kryeministrit Rama ka lëshuar një deklaratë ku nuk mohon lidhjen kontraktuale me Florian Coldea-n, hedh poshtë akuzat për lidhje me kartelet e drogës.

Për BIRN, qeveria ka deklaruar se kallëzuesi është pronar i një televizioni, i cili është dënuar për korrupsion. “Ai është një i dënuar për korrupsion në Rumani dhe aktualisht ka një tjetër proces të hapur po për korrupsion”, thuhet në përgjigje.

Edi Rama, foto LSA

Ndërkohë mediat rumune vijojnë me raportimet për këshilltarin e sigurisë së kryeministrit Edi Rama. "Adevarul.ro" shkruan duke cituar ish-kryeministrin Sali Berisha se Florian Coldea është i përfshirë në biznes me kartelin e frikshëm "Sinaloa".

Shkrimi në median rumune

"Shtypi shqiptar është tronditur të premten nga deklaratat nxitëse të ish-kryeministrit Sali Berisha. Ai, i cili aktualisht ndodhet në arrest shtëpiak, por zbuloi një dokument që tregonte se Florian Coldea, ish-zëvendësdrejtori i parë i SRI-së, ishte këshilltar i jashtëm i sigurisë i kryeministrit aktual shqiptar, Edi Rama, në vitin 2023. Sipas dokumentit, i cituar nga Antena 3, Coldea do të kishte marrë një shumë mujore prej 7000 eurosh për shërbimet e tij. Për më tepër, Berisha hodhi akuza të rënda, duke pretenduar se Florian Coldea dhe njerëzit në rrethin e tij kishin lidhje me kartelin meksikan të drogës 'Sinaloa'", thuhet në shkrim.

"Adevarul.ro" raporton se shtypi rumun publikoi edhe foto të Coldea-s dhe Dorian Duçkës, një tjetër këshilltar i kryeministrit Rama.

"Duçka, një ish-zëvendësministër i qeverisë shqiptare, u emërua edhe në hetimin e FBI-së për rastin e ish-agjentit Charles McGonigal, i cili u dënua me 2 vjet burg për marrjen e 225 mijë dollarëve nga një ish-punonjës i shërbimeve inteligjente shqiptare. Në Shqipëri kryeministri u akuzua nga opozita se ka paguar McGonigal për të sulmuar Partinë Demokratike dhe opozitën", thuhet në shkrim.

Ndërkohë, sipas Agjencisë Kombëtare Rumune të Shtypit, "Agerpress", kryeministri aktual Marcel Ciolacu shprehu shqetësimin e tij se Coldea, pasi kishte punuar në shërbimin inteligjent rumun, ka punuar si konsulent për një palë të tretë.

"Adevarul.ro", duke iu refruar fotove të Florian Coldea-s me Dorian Duçkën, thekson se kjo dëshmon lidhjen e zyrtarit rumin me politikën shqiptare.

Dorian Duçka dhe Florian Coldea

"Në Shqipëri, shtypi i mori këto akuza gjerësisht, duke publikuar imazhe të Florian Coldea-s me Dorian Duçkën dhe zyrtarë të tjerë. Këto pamje paraqiten si dëshmi e lidhjeve të ngushta mes Coldea-s dhe qarqeve të pushtetit shqiptar. Gazetarët shqiptarë raportuan se Florian Coldea, duke përdorur ndikimin e tij, do të kishte lehtësuar aksesin e Marina Pandarof në një rrjet ndërkombëtar të trafikut të drogës, duke sjellë kokainë nga karteli 'Sinaloa' në Shqipëri. Mediat shqiptare përshkruajnë detaje të 'M Network', një strukturë që dyshohet se shpërndante kokainë te VIP-at në Tiranë, ku përfshiheshin biznesmenë me ndikim, politikanë të lartë dhe gjeneralë", shkruan media rumune./CNA