“Keni bërë një punë të jashtëzakonshme”/ Aktivisti Goci intervistë për CNA mbi publikimet e përgjimeve të Veliajt

4 Prill 2025, 22:33, Aktualitet CNA

Pedagogu dhe aktivisti Ervin Goci ka dhënë një intervistë për CNA rreth publikimit të përgjimeve të bisedave të Erion Veliajt të bëra nga paraburgimi i Durrësit.

Goci vlerësoi punën e CNA në këtë rast, të cilën e quajti të jashtëzakonshme si dhe përmendi po ashtu denoncimet e bëra nga media jonë për rastin e inceneratorëve.

Pedagogu tha se shumica e mediave në Shqipëri janë të kapura nga pushteti dhe vetëm pak media i kanë publikuar përgjimet.

Media në funksion të Veliajt. A duhet të jetë në këtë funksion?

Kur media humbet funksionin dhe fillon bën shërbime të tjera, nuk është më media. Nuk kemi informim, komandohen në mënyrë të drejtpërdrejtë me telefon, me porosi, me fjalë. Media që i shërben zyrës së një pushteti, në këtë rast pushteti lokal, që në fakt është pushteti i shumë interesave të tjera, të cilat po dalin ditë pas dite.

Disa media dalin diku edhe kundër pjesës së përgjimeve. A mund të justifikohen me këto pretendime këto media?

Mediat tona e kanë hedhur gjithë lirinë si ata misrat e kalbur në kanale dhe ne jemi në një situatë fatale. Mediat e orkestruara përpiqen ta konfuzojnë opinionin publik.

Ndër vite, a kemi raste që një media të ndikojë në vendimin e një gjykate për një zyrtar?

Prokuroria ka bërë detyrën dhe media për mendimin tim duhet patjetër që t’i zbardhin dhe të kenë kurajë.

Çfarë e pengon kurajën e mediave sot?

Mediat, zgjatim i një sistemi dhe kemi një degradim sistemik. Nëse nesër u vëmë kyçin mediave që dalin në përgjime, shoqëria do jetë më e lehtësuar.

Nëse do krahasohet me periudha kohore, si është media sot në raport me pushtetin?

Është e kapur komplet. Nuk di çfarë epiteti t’i gjej. Po u fute në marrëdhënie korruptive me pushtetarë, me biznesmenë, skema si inceneratorët, je totalisht i kapur, vetëm pret porositësin e radhëës ku të kapësh ndonjë lek. Korrupsioni është në kokë. Janë shumë pak media sot në Shqipëri që mund ta thonë të vërtetën. Ato media që sot thonë të vërtetën nuk kanë marrëdhënie biznesi me biznesmenë të inkriminiuar. 4-5 media shoh me interes.

Ka dhe portale, si rasti i CNA.al dhe CNA TV patjetër, që ka bërë një punë të jashtëzakonshme për të gjurmuar një çështje që nga inceneratorët. Këto përgjime vetëm 3-4 media i publikojnë, Ora News, Syri TV./ CNA