Kazinotë, si lavatriçe parash të pista

29 Qershor 2023, 14:34, Aktualitet CNA

Foto ilustruese

Në Shqipëri ajo që po vihet re është fenomeni i hapjes dhe zgjerimit të kazinove. Kudo në botë ekzistojnë, janë në kontroll, janë me standarde, për hotele me 5 yje, brande e të tjera si këto.

Në Tiranë ka pasur një kazino historike, ajo është te Taivani, që mund të shkosh dhe ta shikosh plot me njerëz, apo një kazino tjetër në qendër te hotel “Plaza”.

Nga ana tjetër, çfarë ka ndodhur. Përveç këtyre dy kazinove, të tjera janë zgjeruar në Tiranë apo dhe në jug.

Shkon në qendër, te stadiumi “Air Albania” kazino, përballë saj tek ish-Sheratoni kazino, matanë te Liqeni i Thatë kazino. Hotele që standardizohen me 5 yje.

Ka plasur “pandemia” e kazinove.

A thua se këto kazino janë plot, dhe dy apo tre, një numër i limituar i tyre, do të ishin ndoshta të mjaftueshme për kryeqytetin, por qeveria ka vendosur të mos ketë kufizime, të japë pafund kazino. Duke bërë një vëzhgim të thjeshtë, në shumë nga kazinotë e Shqipërisë, ajo që bie në sy, është fakti se dy apo tre prej tyre janë të frekuentuara, ndërsa pjesa tjetër janë thuajse bosh, ka më shumë punonjës sesa persona që luajnë, edhe pse kanë hotele me standarde të larta.

Kazinotë shihen edhe si një instrument për pastrimin e parave të pista dhe skema është mjaft e thjeshtë. Deklarojnë shuma të mëdha parash sikur njerëzit luajnë prej një xhiro e lart, por në fakt nuk ka luajtur askush. Janë thjesht pjesë e lavatriçes së parave të zeza.

Apo nga ana tjetër deklarohen dhe faturohen dhoma hotelesh, të cilat rrinë bosh, me vlera të caktuara, dhe janë pjesë e skemës së parave, pra të lavatriçes. Deklarohen 3000, 4000 apo dhe 5000 dhoma në vit, me një përllogaritje të thjeshtë, vlera e të cilave shkon 100 apo 150 euro, të cilat quhen të dhëna falas nga kazinotë, e kështu me radhë, krijojnë një efekt zinxhir pastrimi parash.

Një nga ekspertët e kriminalistikës i tha CNA.al se ky është një fenomen i njohur në botë dhe Shqipëria nuk mund t’i shpëtojë dhe e vetmja mënyrë për të pasur një qasje korrekte është kontrolli i rreptë ndaj këtyre strukturave, ku në shumicën e vendeve të botës paratë e pista qarkullojnë dhe kazinotë përdoren si lavatriçe.

Fenomenet janë mjaft të njohura.

Eksperienca ka treguar se ka jo pak raste në Evropë, por janë shumë të vështira për t’u kontrolluar dhe menaxhuar, pra, për të gjetur “damarët” nga hyjnë paratë e pista.

Në fakt, në Tiranë ka shumë kazino që kanë më shumë punonjës sesa lojtarë. Çka fillon dhe ngre jo pak pikëpyetje në lidhje me arsyen pse funksionojnë ato.

A thua se vërtetë janë hapur për shkak të brandeve të hoteleve me 5 yje, nga ana tjetër janë thjesht instrumente për të pastruar para të zeza, për t’i nxjerrë në të bardhë, nëpërmjet deklarimit të dhomave të hoteleve apo deklarimit të shumave të parave të luajtura, ndërkohë që shumica e kazinove duket se janë bosh dhe nuk kanë lojtarë, përfshi këtu edhe ato në jug të Shqipërisë që në momente të caktuara mund të kenë fluks për shkak të turizmit, por pjesën tjetër të kohës janë bosh, ndërkohë që deklarojnë të ardhura xhiro e të tjera si këto.

Një skemë e qartë që na tregon se duhen ndezur sirenat e alarmit.

Pra, menaxhimi i lojërave të fatit nuk mund të jetë thjesht dhe vetëm një aspekt turisti apo një standard i lartë për hotelet me 5 yje, por kazinotë janë një rrezik se mund të kthehen në “lavatriçe” të parave të pista./ CNA