“Kam krijuar distancë higjienike nga pushteti”/ Rrëfehet Linda Rama: Përpiqem të mos më shohin si paradhomë e zyrës së Edit

16 Gusht 2025, 12:41, Aktualitet CNA

“Kam krijuar distancë higjienike nga pushteti”/ Rrëfehet

Bashkëshortja e kryeministrit Edi Rama, Linda Rama, në një intervistë për "Neëwsbomb.al", ka rrëfyer se ka krijuar një distancë të sigurt higjienike nga pushteti.

Linda Rama është shprehur se i ka rezistuar çdo përpjekjeje për të mos e konsideruar si paradhomë të zyrës së Edit dhe i ka bërë ballë çdo keqkuptimi kur njerëz të afërt a të panjohur, i janë adresuar si pëshpëritëse në veshin e tij.

“Kam krijuar një distancë të sigurt higjienike nga pushteti… I kam rezistuar çdo përpjekjeje për të më konsideruar si paradhomë të zyrës së Edit dhe i kam bërë ballë çdo keqkuptimi kur njerëz të afërt a të panjohur, më janë adresuar si pëshpëritëse në veshin e tij”, shprehet Linda Rama në intervistën e dhënë për "Newsbomb.al".

Sa i përket jetës private, Linda Rama rrëfen se është është bërë gjyshe për herë të dytë, pasi Rea, vajza e saj, ka sjellë në jetë një vajzë, Rui. E tashmë familja e tyre është rritur shumë me gjithë fëmijët që vijnë vërdallë.

“Zaho, Avi dhe Rui janë tre zogj që, kur jemi së bashku, na mbështjellin me një larmi të hatashme zërash e tingujsh, të qarash e të qeshurash, zënkash, ngacmimesh e përqafimesh fëminore. Ndërsa momentet intime familjare secili i konsumon për veten, ndryshe nuk do të quheshin intime”, ka treguar ajo.

Po ashtu ka folur edhe për letrën e grupit të deputetëve të opozitës që kishin dërguar ku kërkonin ta hiqnin nga puna.

Sipas saj, ky akt nga opozita në kohë zgjedhjesh tregonte se për ta pushteti për t'u luftuar nuk ishte Edi me të vetët, por ajo me studimet e saj.

“Fillimisht m’u duk një çudi e madhe që përfaqësimi më i lartë institucional opozitar, në vigjilje të fushatës elektorale, i kishte mbledhur të gjitha forcat dhe firmat e veta, për të më hequr nga puna mua. Jo Edin. Domethënë në atë moment parazgjedhor për opozitën pushteti për t’u luftuar nuk ishte Edi me të vetët, por isha unë dhe studimet e mia”, tha Linda Rama në intervistën e saj në "Newsbomb.al" për Anila Bashën./ CNA