Korça mbushet me vizitorë të huaj gjatë Festës së Birrës/ Nata e tretë, magjike

16 Gusht 2025, 11:51, Aktualitet CNA

Korça mbushet me vizitorë të huaj gjatë Festës

Festa e Birrës në Korçë

Atmosferë fantastike edhe në natën e tretë të Festës së Birrës në Korçë. Qytetarë korçarë, vizitorë vendas e të huaj, janë bërë pjesë e këtij eventi, duke shijuar jo vetëm birrat e shumëllojshme e gatimet tradicionale, por edhe ritmet e muzikës nga emrat e njohur të skenës shqiptare.

Mbrëmjen e tretë performuan Capital T, Vedat Ademi, Devis Xherahu dhe Young Zerka, të cilët ndezën skenën me hitet e tyre.

Në këtë natë bien në sy të rinjtë e huaj, të cilët të shoqëruar nga miqtë shqiptarë, tregojnë përjetime të veçanta dhe krijojnë ura miqësie mes vendeve.

Dy të rinj grekë, që për herë të parë vizitojnë festivalin, ndanë emocionet e tyre. Njëri prej tyre tha se atmosfera është e mrekullueshme dhe ushqimet e birrat janë të shkëlqyera, ndërsa një tjetër e përshkroi festivalin si perfekt dhe premtoi se do të rikthehet sërish.

"Unë jam nga Greqia dhe për mua është hera e parë që vij në Festën e Birrës. Kam ardhur me familjen time. Atmosfera këtu është e mrekullueshme dhe birrat janë shumë të mira. Jam shumë i entuziazmuar që jam në këtë festival dhe do të vij edhe natën e katërt. Birrat dhe kërnackat janë fantastike."

"Vij nga Greqia, nga Selaniku. Është hera e parë që vij. Kam shokë e shoqe këtu dhe më ftuan. Ç'mund të them për atmosferën, është perfekte. Më pëlqen çdo gjë këtu."

Në këtë festë nuk mungojnë edhe vizitorët që e kanë kthyer pjesëmarrjen në traditë. Një ukrainase, e martuar me një shqiptar dhe që jeton në Durrës, u shpreh se Festa e Birrës është arsyeja pse çdo vit rikthehet në Korçë për të përjetuar atmosferën e veçantë.

"Jam nga Ukraina, jetoj në Durrës dhe kam ardhur shpesh sepse më pëlqen Festa e Birrës në Korçë. Njerëzit janë shumë të mirë, unë jam e martuar me bashkëshortin tim shqiptar. Më pëlqen Shqipëria."

E njëjta eksperiencë për shumë qytetarë shqiptarë që jetojnë jashtë vendit, por që nuk mungojnë në këtë event, duke e cilësuar organizimin e këtij viti si shumë më të mirë se vitet e kaluara.

"Unë jetoj jashtë shtetit, por që nga viti i parë që është organizuar Festa e Birrës, gjithmonë kam ardhur dhe kam qenë prezent. Vij me familjarët e mi, ushqehemi, pijmë, gëzohemi e kënaqemi. Shumë mirë këtë vit, duket se ka shumë njerëz. Edhe bashkia e ka organizuar shumë mirë, jemi shumë të kënaqur. Deri natën e fundit do të qëndrojmë."

"Vij çdo vit te Festa e Birrës. Atmosfera shumë e mirë, s'ka ku shkon më mirë. Kam ardhur me familjen, me djalin, me vajzën e me bashkëshorten, po ashtu edhe me miq. Festa më duket shumë më e mirë se vjet, një mrekulli. Turistë ka shumë, edhe këngëtarët shumë të mirë këtë vit."

Festa e Birrës vazhdon edhe më tej. Nata e katërt pritet të ndezë skenën me emra të tjerë të njohur, mes tyre Vesa Luma, Alban Skënderaj dhe këngëtari grek Triantafillos./ CNA