Ish-kryebashkiaku socialist i arrestuar në Itali me kokainë i shpëton hetimit pasuror

11 Shkurt 2023, 11:42, Aktualitet CNA

Ish-kryebashkiaku socialist i arrestuar në Itali me kokainë i

Prokuroria e Posaçme kundër Korrupsonit dhe Krimit të Organizuar, SPAK, deklaroi se nuk ka filluar asnjë hetim pasuror për ish-kreun e Bashkisë së Vorës, Agim Kajmaku, ndonëse ndalimi i tij me 20 kilogramë kokainë në Itali është bërë publik në mediet shqiptare dhe ato italiane që prej majit të vitit të kaluar.

Kajmaku u ndalua në maj të vitit 2022 nga policia italiane, pasi së bashku me një të afërmin e tij, iu gjetën rreth 20 kilogramë kokainë e fshehur në vazo me lule. Ndaj Kajmakut ka pasur një tjetër proces penal në Shqipëri. Ai u arrestua në 6 maj të vitit 2020, pasi Prokuroria e Tiranës e kishte shpallur në kërkim prej muajit nëntor 2019 për “shërdorim detyre”, “falsifikim të formularëve”, si dhe një akuzë të tretë për “kryerje të funksionit pas dhënies fund të tij”. Por, gjykata e liroi pas dy ditësh duke përdorur si argument ndër të tjera edhe gjendjen e tij shëndetësore dhe caktoi masën e sigurimit personal “detyrim paraqitje”.

Ish-kryebashkiaku socialist i arrestuar në Itali me kokainë i

I pyetur nga "BIRN" nëse ishte filluar hetimi pasuror për Kajmakun, SPAK-u informoi nëpërmjet kordinatores për mediet, Xhuljeta Krasta, se: “Nuk ka ndonjë material referues nga policia gjyqësore apo institucione të tjera ligjzbatuese për fillimin e procedimit penal apo verifikim pasuror ndaj shtetasit Agim Kajmaku”, që të lidhet me ndalimin e tij në Itali me rreth 20 kg kokainë.

Deri në publikimin e këtij shkrimi, SPAK-u nuk ka informuar pse nuk ka vlerësuar të arsyeshme të fillojë kryesisht deri tani hetimin e ligjshmërisë së pasurive të Kajmakut, bazuar në informacionet e bëra publike.

Legjislacioni penal shqiptar mundëson hetimin kryesisht nga ana e prokurorive, bazuar në të dhëna në siguruara nga burimet e hapura apo dhe prej burimeve jopublike. Ndërkohë, ligji i vitit 2009 “Për parandalimin dhe goditjen e krimit të organizuar, trafikimit, korrupsionit dhe krimeve të tjera nëpërmjet masave parandaluese kundër pasurisë”, përcakton fillimin e hetimeve për ligjshmërinë e burimeve të pasurisë për të gjithë personat e hetuar për vepra penale të krimit të organizuar dhe korrupsionit.

Kajmaku u zgjodh kryebashkiak i Vorës në zgjedhjet e bojkotuara nga opozita më 30 qershor 2019. Zgjedhja e tij u denoncua nga Partia Demokratike, së bashku me atë të Valdrin Pjetrit në Shkodër dhe disa kryebashkiakëve të tjerë të Partisë Socialiste, për shkelje të ligjit të dekriminalizimit. Akuzat ndaj Kajmakut rezultuan të vërteta pas verifikimeve të kryera nga Prokuroria e Përgjithshme. Ai e humbi mandatin më 1 nëntor 2019, për shkak se nuk kishte deklaruar në formularin e dekriminalizimit ndalimin dhe hetimin e tij në Greqi nën emrin Jorgo Toto për veprën penale të përdorimit të parave false.