Instalohen aparaturat e reja/ Manastirliu: Gati spitali ultramodern i Sëmundjeve të Brendshme në QSUT

14 Shkurt 2023, 13:45, Aktualitet CNA

Instalohen aparaturat e reja/ Manastirliu: Gati spitali ultramodern i

Ministrja e Shëndetësisë dhe Mbrojtes Sociale, Ogerta Manastirliu

Instalohen aparaturat e teknologjisë së lartë në Spitalin e Ri të Sëmundjeve të Brendshme.

Instalimi i këtyre aparaturave u inspektua nga ministrja e Shëndetësisë dhe Mbrojtes Sociale, Ogerta Manastirliu, bashkë me shefat e shërbimit dhe drejtuesit e QSUT.

“Angiografia është instaluar në Spitalin e Sëmundjeve të Brendshme që do të fuqizojë padyshim shërbimin e Hemodinamikës edhe sigurisht do t’u hapë rrugë edhe ndërhyrjeve të tjera invazive dhe të kombinuara. Është vërtetë një prej hapave të modernizimit të mëtejshëm të shërbimeve në sëmundjet interne në këtë spital të ri, do të pasohet menjëherë nga transferimi i aparaturave të tjera, por kjo është një aparaturë e re që rrit edhe në numër ndërhyrjet invazive dhe synon edhe kompleksitetin e ndërhyrjeve invazive në zemër, si dhe për aspekte të tjera të procedurave që ky aparat shërben”, tha Manastirliu.

Ministrja e Shëndetësisë dhe Mbrojtjes Sociale bëri me dije se spitali i ri ultramodern do të hapet brenda muajit mars dhe do të ofrojë për qytetarët shërbim me standarde europiane.

“Ne duam që brenda muajit mars të fillojmë funksionimin e këtij spitali. Urgjenca polivalente do të jetë një shërbim, i cili transferohet në spitalin ekzistues, por tashmë edhe me modalitete të reja, edhe me një mënyrë të re organizimi dhe fakti që tashmë do të kemi një spital të gjitha ekzaminimet për sa i përket urgjencës edhe për sa i përket intervencionit do të ketë të gjithë aparaturat e nevojshme dhe do të krijojë më shumë lehtësi, më shumë fleksibilitet, por edhe më shumë dinamikë në trajtimin e rasteve dhe shërbimeve më cilësore”, tha Manastirliu.

Spitali i Ri i Sëmundjeve të Brendshme në QSUT, një investim madhor, i cili do të sigurojë standardet më të larta europiane në çdo aspekt, ka një kapacitet prej 350 shtretërish. Spitali i ri i Sëmundjeve të Brendshme do të ofrojë shërbimin e mjekësisë interne, shërbimin e reumatologjisë, alergologjisë, dermatologjisë dhe fizioterapisë që aktualisht ndodhen në godina të tjera të QSUT-së, dhe së bashku me shërbimet ekzistuese, ato të gastrohepatologjisë, hematologjisë, endokrinologjisë, nefrologjisë, dializës, njësisë së kardiologjisë, hemodinamikës dhe reanimacionit të kardiologjisë do të kompletojnë profilin e një spitali të mirëfilltë të sëmundjeve të brendshme.

Spitali i ri do të ketë edhe një spital ditor me 60 shtretër, për rritjen e eficiencës së shërbimeve.

Spitali i ri i Sëmundjeve të Brendshme do të ketë 9 salla leksioni dedikuar studentëve të mjekësisë, ku do të zhvillohen praktikat mjekësore, si dhe edukimi në vazhdim./ CNA.al