Hakerimi i e-maileve të SPAK-ut/ Gazetari Elvi Fundo: Grup i strukturuar kriminal, mendoj se "truri" është Xhafaj

7 Prill 2025, 10:06, Aktualitet CNA

Hakerimi i e-maileve të SPAK-ut/ Gazetari Elvi Fundo: Grup i strukturuar

Gazetari Elvi Fundo, i ftuar në emisionin “Kafe Shqeto” me Flavio Qarrin, ka folur për hakerimin e e-maileve të prokurorëve të SPAK-ut. Fundo ka thënë se dy personat e përfshirë në hakerim, Arnold Rrokaj dhe Zambak Gjoni, nuk janë hacker-ë, por janë zyrtarë të PS-së.

Emrat e Gjonit dhe Rrokajt, Fundo tha se janë të lidhur ngushtë me Fatmir Xhafajn dhe Agim Ismailin. Më konkretisht, Arnold Rrokaj ka qenë punonjës i IMT në kohën kur ky institucion drejtohet nga Agim Ismaili.

Gazetari Fundo u shpreh se sipas mendimit të tij, truri i gjithë kësaj është Fatmir Xhafaj.

“Një nga personat që është përfshirë më tha që materialet janë marrë dy javë më parë. Arnold Rrokaj dhe Zambak Gjoni të dy zyrtarë të PS-së, nuk janë hacker-ë. Njëri në IMT, ku ka qenë drejtor Agim Ismaili. Tjetri, Zambak Gjoni, drejtor i paraburgimit i Vlorës. Dritan Palnikaj, sekretar i Përgjithshëm kur Xhafaj ka qenë ministër i Brendshëm, është nipi i Agim Ismailit.

Mjafton të shikoni cilat media reagojnë për Zambak Gjonin.

Mendoj se 'truri' i kësaj pune ka qenë Fatmir Xhafaj. Agim Ismaili ka vajzën që punon te vëllai i Fatmir Xhafajt. Te rrjedhja dhe përpunimi i informacioneve kemi të bëjmë me një grup të strukturuar kriminal për të goditur SPAK-un. Po u qëndrove kundër këtyre hajdutëve të pushtetit je i opozitës”, u shpreh Fundo.

Gazetari Elvi Fundo tha se materialet që dolë nga SPAK kanë rrjedhur ditën e gjyqit.

"Më kanë nisur materiale në telefonin tim. I pashë dhe thashë janë në ‘spin’. Më dërgoheshin dokumente që të tërhiqej vëmendja nga çështja dhe vendimi i Erion Veliajt. Kur prokurorët i kanë dhënë përgjimet në tavolinë Veliajt dhe i është përmendur emri i Bollinos dhe Mero Bazes, Veliaj ka reaguar, e ka thënë që i ka miq. Më mirë ata se sa t’i shes përgjimet te Elvi Fundo", tha Fundo.

Gjithashtu në intervistën televizive, gazetari Elvi Fundo ka sfiduar Mero Bazen dhe Carlo Bollino-n të dorëzojnë telefonat në SPAK të tre.

“Sfidoj publikisht Mero Bazen dhe Carlo Bollino-n t’i çojmë telefonat në SPAK të tre. Mero Baze që sot bën moral, duhet të kujtojmë që sot është kthyer në sulltanin e jugut, një Koço Kokëdhimë i dytë. Këto që po i bëjnë tani këtij vendi duke u përdorur tani si një grup i strukturuar kriminal në media”, tha Fundo./ CNA