Fortlumturia e Tij, Joani: Më e lehtë është të hyjë gamilja në vrimë të gjilpërës se i pasuri në parajsë

31 Gusht 2025, 11:48, Aktualitet CNA

Fortlumturia e Tij, Joani në të Dielën e XII të Mattheut ka përcjellë mesazhe mjaft të rëndësishme, duke na sjellë disa nga porositë e Zotit, të respektojmë nënën dhe babain si dhe të kujdesemi për të afërmit tanë.

Gjatë fjalës së tij, Kryepiskopi Joan renditi disa nga urdhërimet e Zotit që janë mos vidh, mos vrit, mos shkel kurorën, mos jep dëshmi të rreme, respekto nënën dhe babain dhe duaje të afërmin si veten tënde.

Po ashtu përcolli edhe fjalën e Ungjillit të Shën Markut ku në fund përcillet një mesazh “që është shumë e vështirë të hyjë një i pasur në parajsë”

“Është më lehtë të hyjë gamilja në vrimë të gjilpërës se sa i pasuri në parajsë”, u shpreh Kryepiskopi Joan.

“Shën Nikolai ish-Mitropoliti i Ohrit thotë diçka shumë të bukur: Të gjithë ne jemi të sëmurë. Shenjtorët janë ata që janë më pak të sëmurë.

Mund të jemi më pak të sëmurë se njerëzit e tjerë por në krahasim me Perëndinë jemi të gjithë të sëmurë prandaj kemi nevojë për praninë e Perëndisë dhe për të ndjekur shembullin që na ka dhënë ai përmes jetës së tij dhe mësimit.

Zoti thotë ndiq urdhërimet e djali u përgjigj e i tha cilat urdhërime. Tha mos vidh, mos vrit, mos shkel kurorën, mos jep dëshmi të rreme, respekto nënën dhe babain dhe duaje të afërmin si veten tënde.

Dhe ai u përgjigj me çiltërsi duke i thënë të gjitha këto i kam ruajtur prej rinisë sime.

Në ungjillin e Shën Markut thuhen dhe këto fjalë : “Zoti e pa atë dhe e deshi dhe i tha një gjë të mungon, shko e shit gjithë pasurinë, shpërndaua të varfërve dhe eja më ndiq mua”.

Ky u largua i hidhëruar se kishte shumë pasuri e Zoti thotë fjalët e famshme që njihen pothuajse nga të gjithë që është shumë e vështirë të hyjë një i pasur në parajsë.

Është më lehtë të hyjë gamilja në vrimë të gjilpërës se sa i pasuri në parajsë”, tha Kryepiskopi Joani./ CNA