Festim panagjirik në të kremten e Shën Kozmait të Etolisë, me pjesëmarrjen e Fortlumturisë së Tij, Joanit

24 Gusht 2025, 13:53, Aktualitet CNA

Festim panagjirik në të kremten e Shën Kozmait të

Festim panagjirik në të kremten e Shën Kozmait të Etolisë, me pjesëmarrjen e Fortlumturisë së Tij, Joanit.

I ndritshëm, i mbushur me hirin hyjnor dukej manastiri i shenjtë i Hierodëshmorit Kozma, sot, më 24 gusht 2025, në ditën kur Kisha Orthodhokse kremton kujtimin e tij. Një festë e veçantë me një madhështi unike. Besimtarë të shumtë vendas kërkuan nxehtësisht ndërmjetimet e shenjtit.

Shërbesat e shenjta u drejtuan nga Kryepiskopi i Tiranës, Durrësit dhe i Gjithë Shqipërisë, Imzot Joani dhe bashkë me të morën pjesë Mitropolitët i Beratit Imzot Asti, i Amantias Hirësi Nathanaili, si edhe Episkopi i Krujës Hirësi Anastasi dhe priftërinj nga Mitropolitë e vendit.

Shën Kozmai i Etolisë, hierodëshmori i lumtur dhe i barabartë me apostujt, jetoi dhe veproi gjatë shekullit të 18-të. Është nga shenjtorët e Kishës që quhen dëshmorë të rinj dhe u shfaqën në vitet e perandorisë Otomane.

Figura si shën Kozmai i Etolisë, me shembullin, mësimdhënien dhe sakrificën e tyre, mbajtën të gjallë besën ortodokse të të krishterëve të skllavëruar të Lindjes.

Shën Kozmai shkoi në Kostandinopojë, mori leje dhe bekim nga Patriku Ekumenik i asaj kohe dhe në vitin 1760, në moshën 46 vjeçare, filloi veprën e tij misionare.

Shën Kozmai bëri 4 udhëtime të mëdha në krahina të ndryshme të Ballkanit përfshi dhe Shqipërinë.

Dashuria ndaj Perëndisë dhe dashuria ndaj të afërmit ishin dy pikat kryesore rreth të cilave bënte fjalë predikimi i tij.

Veprimtaria e tij misionare zgjati 20 vjet. Shën Kozmain e respektonin shumë edhe të krishterët edhe myslimanët.

E varën në pemë dhe kështu u martirizua në 24 Gusht të vitit 1779 në fshatin Mujalli të Fierit. Trupin e tij e hodhën në lumë dhe të krishterët e morën dhe e varrosën me shpresëtari në fshatin Kolkondas.

Patriarkana Ekumenike më 20 Prill të vitit 1961 e renditi shën Kozmain e Etolisë me Martirët e rinj duke e quajtur të barabartë me Apostujt./ CNA