web counter
LEXO PA REKLAMA!

SHKARKO APP

App Store
Google Play

E fundit!

x

Dy “ushtarë” të Veliajt në krye të Burgjeve e SHKBB-së/ Gogu tenton të justifikojë emërimet në Korçë

17 Prill 2026, 18:37, Aktualitet CNA

Pak kohë pas emërimit të Adriatik Kupit në krye të Burgjeve, ministri Toni Gogu ka zyrtarizuar edhe emërimin e Gentjan Myrtos në krye të SHKBB-së, duke plotësuar kështu "kupolën" e re të sistemit penitenciar me njerëz të cilën njihen si besnikë të kryebashkiakut Erion Veliajt.

Këtë të premte, ministri i Drejtësisë Toni Gogu ndodhej në Korçë, nga ku u pyet nga CNA se si ka mundësi që Drejtori i Përgjithshëm i Burgjeve dhe kreu i SHKBB-së janë mbështetës të Erion Veliajt dhe nëse kjo është një strategji për të shpëtuar kryebashkiakun nga 13 akuzat që rëndojnë mbi të.

Ministri në tentativë për të mbrojtur zgjedhjet e tij, zgjodhi retorikën standarde duke deklaruar se drejtuesit e burgjeve dhe ai vetë janë shërbyes vetëm të ligjit dhe të qytetarëve, qofshin ata brenda apo jashtë institucioneve.

"Drejtuesit e burgjeve, por edhe unë së bashku me ta, jemi shërbyes vetëm të ligjit. Dhe jemi shërbyes të të gjithë kuadrit ligjor në fuqi dhe të rendit ligjor në Shqipëri, madje në shërbim të të gjithë qytetarëve të Shqipërisë, qoftë ata të cilët janë jashtë shërbimit të ekzekutimit të vendimeve penale, por edhe ata që janë duke i vuajtur ato brenda institucioneve", deklaroi Gogu.

Kujtojmë se Adriatik Kupi, i emëruar me 1 prill, njihet si një "ushtar" besnik i Veliajt dhe ish-administrator i Petrelës.

Po ashtu, emërimi më i fundit i Myrtos në krye të SHKBB-së, i cili më herët ka mbajtur postin e kryetarit të Njësisë Administrative Vaqarr, mbyll rrethin e sigurisë, duke vendosur një tjetër mbështetës të Veliajt në detyrën për të kontrolluar ligjshmërinë brenda burgjeve.

Këto emërime shihen si një zinxhir mbrojtës që e kthen sistemin në një mburojë për njerëzit e pushtetit, si Veliaj.

Pyetja që mbetet pas vizitës së ministrit në Korçë është se cilët qytetarë po shërbehen realisht, ata që presin drejtësi për vjedhjen e miliona eurove, apo Erion Veliaj të cilit po i vendosen miqtë e ngushtë në pikat kyçe të sistemit?/ CNA

 





Lajmet e fundit nga