Dumani rendit problematikat: Ngarkesë me dosjet e mbartura, mungojnë këshilltarët ligjorë

12 Prill 2024, 10:03, Aktualitet CNA

Dumani rendit problematikat: Ngarkesë me dosjet e mbartura, mungojnë

Altin Dumani

Kreu i SPAK-ut, Altin Dumani, gjatë fjalës në Komisionin për Integrimin renditi disa nga problematikat që has SPAK-u në punën e përditshme.

Ai tha se ka një ngarkesë me dosjet e mbartura dhe se ka mungesë të këshilltarëve ligjorë.

Duke iu referuar rekomandimeve të BE-së, Dumani tha se tri rekomandimet e BE-së janë adresuar dhe po punohet për përgatitjen e strategjive për hetimin pasuror, reduktimin e dosjeve të mbartura dhe një strategji komunikimi.

Fjala e Dumanit:

Veprimtaria e SPAK-ut në 2023-shin ka njohur një rritje cilësore që është vlerësuar edhe nga BE. SPAK gjatë 2023 ka luajtur një rol të rëndësishëm për nxjerrjen e Shqipërisë nga lista gri, një nga arsyet e këtij vendimi ka të bëjë me punën e SPAK-ut, konfiskimin dhe pastrimin e parave. Këtë vit kemi vendosur kontakte të drejtpërdrejta me vende të Amerikës Latine dhe falë edhe vendosjeve të këtyre kontakteve lufta jonë kundër krimit të organizuar ka pësuar një rritje cilësore. Kemi pasur bashkëpunim të mirë më homologët rajonalë.

SPAK-u i ka dhënë një rëndësi të veçantë luftës kundër pastrimit të produkteve të veprës penale. Në SPAK është bërë traditë që krahas hetimit penal bëjmë dhe një hetim pasuror me qëllimin e vetëm hetimin e pasurive që dyshohet se kanë orgjinë nga krimi. Falë edhe punës shpjegohet rritja e numrit të sekuestros. Gjatë 2023 prokuroria ka rritur numrin e çështjeve penale. Sa i takon luftës kundër krimit të organizuar kemi një bashkëpunim të mirë edhe me vendet e BE-së.

Lufta kundër korrupsionit, lidhur me rekomandimet e BE-së në adresë të SPAK-ut janë cilësuar 3 rekomandime, SPAK mori takim me projekt-asistentë të BE-së.

Ulja e çështjeve të mbetura, shqetësuese për SPAK-un dosjet e mbartura. SPAK do të përgatisë një strategji të veçantë për këtë aspekt. Një rekomandim tjetër ishte përgatitja e një strategjie komunikimi me publikun për të cilën po punohet edhe falë ndihmës nga ekspertët ndërkombëtarë.

Mungesa e përcaktimit të statustit ligjor pas përfundimit të mandatit të prokurorit të SPAK-ut. Presim që Kuvendi t'i japë zgjidhje kësaj problematike. Po ashtu edhe mungesa e këshilltarëve ligjorë. SPAK-u përfaqëson çështje në tri shkallë të gjykimit, e herë pas here dhe në GJK. Pasja e këshilltarëve ligjorë do të ndihmonte shumë./CNA