“Do të vazhdojmë, por me frikë”/ Fermerët e Korçës, kundër kuponit tatimor për qumështin

15 Korrik 2025, 14:38, Aktualitet CNA

“Do të vazhdojmë, por me frikë”/ Fermerët e

Paralajmërimi i kryeministrit Edi Rama se çdo produkt bulmeti do të duhet të shitet me kupon tatimor ka shkaktuar reagime të forta në zonën e Korçës.

Fermerët e quajnë këtë një vendim të padrejtë, që u rrezikon të vetmen mënyrë mbijetese, tregtimin e qumështit nga shtëpia në qytet.

Prej dekadash, çdo mëngjes, dhjetëra fermerë zbresin nga fshatrat për të shitur qumësht në qytet. Ata thonë se nuk mund t’u shesin baxhove, pasi çmimi është shumë i ulët dhe nuk i mban gjallë.

"Rama ka xhepat e ngrohtë e as s'i shkon ndër mend për ne fshatarët. Çfarë ndihmë më ka dhënë mua ai që unë të mos sjell qumësht në Korçë. Unë me atë qumësht mbaj shtëpinë, me ato 7- 8 bidona. Ai thotë do t'ju zë e do t'ju fut brenda. Ne do të vazhdojmë, por me frikë. Unë kam 30 vite që tregtoj qumështin. Ai mbase do t'ua japë baxhove më lirë, që ështe 60 lekë kg. Subvencione për bagëtinë nuk kemi marrë asnjëherë. Kam pasur shumë bagëti, por duke parë krizën i shita, mbaj një lopë sa për fëmijët. Edhe për atë një s'do të më lërë."

Fermerët ndihen të papërfaqësuar dhe të lënë pas dore nga shteti. Ata thonë se në vend që të ndihmohen, po i ndëshkojnë.

"Kam 30 vite me shitjen e qumështit, tani del policia e thotë hiqeni. Ne do të vazhdojmë ta shesim. Siç i morën ata në Theth me gurë e me zjarr që po ua prishin shtëpitë ashtu do t'ia bëjmë edhe ne Ramës. Kam 3 lopë dhe mbaj 4 fëmijë. Asgjë s'na ka dhënë shteti. Na sollën vërdallë edhe për naftën dhe për subvencionet e bagëtive. Qumështin do ta mbaj në shtëpi dhe të zënë radhë qytetarët si në kohën e Enver Hoxhës. Qytetarit i bëhet dëmi se i bie që të vijnë që në orën 4:00 të mëngjesit në Ravonik të marrin qumështin."

Fermerët i kërkojnë qeverisë të rishikojë këtë masë dhe të gjejë zgjidhje që nuk dëmton fermerin e vogël, i cili për vite me radhë është përpjekur të mbijetojë pa ndihmë dhe pa subvencione. Ata thonë se nuk kanë nga të tërhiqen, sepse, ndryshe nga politikat, lopët nuk presin./ CNA