Dëshmia tronditëse/ I riu i jepte kontraceptivë të miturës që të mos mbetej shtatzënë

11 Janar 2024, 09:59, Aktualitet CNA

Dëshmia tronditëse/ I riu i jepte kontraceptivë të

Emisioni "Fiks Fare" solli detaje tronditëse nga ngjarja e fshatit Vërdovë të Pogradecit, ku një 29-vjeçar abuzonte me një 12-vjeçare prej 2 vitesh dhe që të mos mbetej shtatzënë ai i jepte kontraceptivë që 10 vjeçe.

E ëma e të miturës tregoi për "Fiks"-in se vajza e saj prej 2 vitesh flinte në dhomë vetëm me 29-vjeçarin, por ajo kishte kuptuar se kishte marrëdhënie seksuale mes tyre vetëm para dy muajsh. “Unë nuk e dija këtë gjë deri para 2 muajsh, kur i dëgjova pas dere edhe pse e mbanin të mbyllur dhe mbyllnin edhe vrimën e çelësit”, tregoi për "Fiks"-in nëna e të miturës.

Ndërkohë e mitura në prezencë të gazetarëve tregon se sa herë kryenin marrëdhënie seksuale 29-vjeçari kujdesej t’i merrte kontraceptivë që të mos mbetej shtatzënë. Në prani të së ëmës e mitura flet për familjen e djalit, ku sipas saj i ati dhe vëllai i tij e dinin marrëdhënien e tyre.

12-vjeçarja duket e mërzitur me të ëmën për shkak të denoncimit që kjo e fundit ka bërë, pasi sipas saj djali nuk duhet të shkonte në burg. Gjatë bisedës me "Fiks"-in pranon se 29-vjeçari ishte bërë shpeshherë pengesë për të mos shkuar në shkollë, duke qëndruar me të e mbyllur në dhomë.

Kjo gjë ka sjellë edhe problemet shëndetësore për të miturën, gjë që e ëma i ka vënë re, pasi shpesh ajo mungonte në shkollë nga dhimbjet e barkut.

"Fiks"-i nuk qëndroi vetëm te dëshmitë e tyre, por trokiti nëpër institucione për të mësuar mbi fatin e të miturës.

Në shkollën ku 12-vjeçarja mësonte, nëndrejtoresha tregon se ajo prej 2 ditësh nuk ka ardhur në shkollë, madje nuk ka asnjë informacion se ku është.

“Kam telefonuar disa herë të ëmën nuk më është përgjigjur, nuk e di fare pse s’ka ardhur dhe ku është”, thotë nëndrejtoresha.

Ndërkohë për psikologen e shkollës shqetësimi kryesor është gjendja e tyre ekonomike, pasi edhe vajza edhe e ëma trajtohen me KEMP. Kjo se edhe e mitura ka një problem në këmbë, ndërsa e ëma në shikim.

Për rastin ajo është e painformuar, duke referuar rastin te punonjësja sociale e bashkisë, e cila mjaftohet me faktin që e mitura do jetë në një fshat të largët të Pogradecit.

Gazetarët e "Fiks"-it morën një përgjigje edhe nga Njësia e Mbrojtjes së Fëmijëve në Bashki, ku sipas punonjëses ky institucion po merret me rastin. “Akti i ekspertimit nuk është bërë, se nuk kemi më ne kompetenca, i ka vetëm prokurori. Për sa i përket shkollës do shkojë pasi t’i gjejmë një banesë që t’ia paguajë bonusin bashkia”, thotë punonjësja.

Kështu, e mitura mori vëmendjen mediatike për tri ditë me radhë mbi atë ç'ka i ka ndodhur, por askush nuk u mor me faktin se si është ajo pas gjithë kësaj historie. Sot është pa shkollë dhe e braktisur./TCH