Hetimet për ish-ministrin Beqaj/ Gazetarja tregon shkeljet me faturat

10 Janar 2024, 22:55, Aktualitet CNA

Gazetarja Glidona Daci ka folur për hetimet që po kryhen ndaj ish-ministrit të Shëndetësisë Ilir Beqaj.

E ftuar në emisionin "Opinion", gazetarja ka treguar skemën se si u krijua restoranti Gzona dhe se Beqaj po hetohet se nuk ka deklaruar në subjektin e deklarimit të pasurisë restorantin, në të cilin bashkëaksionere ka qenë bashkëshortja e tij.

“Restorant “Gzona” u krijua nga bashkëshortja e Beqajt dhe Arti Malaj me aksione të barabarta 50%. Më pas, nga 2019 deri në 2021-shin, bashkëshortja e Beqajt bën një akt dhurimi, 35%. Më pas, në 2020, ajo bën akt shitje 15% dhe shet të gjitha aksionet Arti Malajt, duke u spostuar totalisht nga restorant “Gzona”. Nga ana tjetër, Arti Malaj në 2021-shin, bën shitje në 2021-shin dhe ja dhuron Eduart Currajt, një nga aksionerët e “Delta Farma”. Nga ana tjetër, gjatë gjithë verifikimeve që ka kryer SPAK dhe përgjimeve të Ermal Kurtulajt sepse ai është personi kyç. ”Gzona” ka kryer shërbime të ndryshme për evente, të cilat i ka kryer “Delta Farma” dhe ka shkuar në vlerën rreth 100 milionë Lekë të vjetra”, tha gazetarja për emisionin Opinion.

Më tej ajo bëri me dije se ku qëndronin shkeljet, duke theksuar se drekat dhe darkat e delegacioneve bëheshin tek Gzona ndërsa faturat i merrnin në lokalet e tjera.

“Referuar hetimeve të SPAK, me të vërtetë Adriana Beqaj heq dorë nga restorant “Gzona”, por nga ana tjetër, Ermal Kurtulaj që është njeriu më i besuar i Ilir Beqajt… Ilir Beqaj nuk i ka deklaruar këto lidhje. Rezulton që në një komunikim që ka pasur me Ermal Kurtulajn, ky i fundit kërkon disa fatura fiktive. E thënë me fjalë të thjeshta, shërbimet e delegacioneve të huaja që kanë mbërritur në Shqipëri apo evente të ndryshme, janë bërë pikërisht tek restorant “Gzona”, ndërsa faturat janë prerë tek restorante të tjera.

Drekën e kanë marrë tek “Gzona”, ndërsa faturën e kanë marrë tek “lokali i Fevziut”. I kanë thënë që do të më japësh X faturë dhe ti do të marrësh X për qindje parash. Kështu rezulton në dosje që janë bërë faturat sepse edhe personat që kanë lëshuar këto fatura fiktive kanë pasur pjesën e tyre të parave. Sipas vendimit të gjykatës thuhet se nëse një X shërbim i caktuar ofrohej tek Gzona, fatura nuk është bërë nga Gzona, por nga X restorant tjetër. Lekët janë bërë me fatura fiktive dhe nuk janë ofruar fatura”, tha gazetarja./ CNA