Carlo Bollino, në telashe/ Paditet në SPAK

10 Janar 2024, 20:04, Aktualitet CNA

Carlo Bollino

Anëtari i Kryesisë së Partisë Demokratike, Belind Këlliçi ka bërë me dije se Sekretari i Përgjithshëm, Flamur Noka ka firmosur kallëzim penal në SPAK, për botuesin Carlo Bollino.

Gjatë një interviste në Syri Tv, Këlliçi u shpreh se janë dhjetra akuza ndaj Bollinos dhe jo vetëm, duke renditur disa prej tyre si : grabitje dhe vjedhje e truallit në ish kompleksin Partizani, mashtrim dhe përpilim i deklaratave të rreme, falsifikim i dokumenteve, përfitimi i paligjshëm i interesave, shkelje e barazisë së pjesëmarrësve në tendera apo ankande publike, pastrimi i produkteve të veprës penale, moskallëzim krimi dhe përvetësim i parave ose mallrave që rrjedhin nga vepra penale ose veprimtari kriminale për të cilat Carlo Bollino së bashku me një pjesë tjetër të kabinetit qeveritar janë kallëzuar nga Flamur Noka zyrtarisht në SPAK.

Detajet rreth kallëzimit penal, Këlliçi u shpreh se do t’i japë nesër në një konferencë për shtyp.

“Nesër do ketë një konferencë për shtyp nga Sekretari i Përgjithshëm i PD-së Flamur Noka dhe unë në lidhje me kallëzimin penal të cilin Noka ka firmosur për Carlo Bollinon dhe jo vetëm. Janë dhjetëra akuza për të cilat akuzohet Carlo Bollino.

Në rastin e grabitjes dhe vjedhjes së truallit në ish kompleksin Partizani, duke nisur nga mashtrimi dhe përpilimi i deklaratve të rreme, falsifikimi i dokumenteve, përfitimi i paligjshëm i interesave, shkelje e barazisë së pjesëmarrësve në tendera apo ankande publike, pastrimi i produkteve të veprës penale, moskallëzim krimi dhe përvetësimi i parave ose mallrave që rrjedhin nga vepra penale ose veprimtari kriminale për të cilat Carlo Bollino së bashku me një pjesë tjetër të kabinetit qeveritar janë kallëzuar nga zoti Flamur Noka zyrtarisht në SPAK.

Dhe në këtë rast ta garantoj se pronari i Report Tv që është një televizion privat i Erion Veliajt, një prej televizioneve që mund të ketë arritur rekordin e shpifjeve ndaj gjithë funksionarëve të opozitës, një prej televizioneve që ushqehet me paratë e inceneratorit të Tiranës sepse unë e kam bërë publike dhe faturën në Kuvendin e Shqipërisë që paguhej për Report Tv në vitin 2021.

Të jeni të bindur që janë me dokumente të kopsitura, me fakte të pakontestueshme, të pamohueshme”, tha Këlliçi./ CNA