Rritje të rasteve me grip në Korçë/ Afro 120 vizita në ditë në Urgjencë dhe Pediatri

10 Janar 2024, 10:58, Aktualitet CNA

Rritje të rasteve me grip në Korçë/ Afro 120 vizita

Vlefta Bejko

Vlefta Bejko, Shefe e Urgjencës në Spitalin e Korçës, shprehet se ka një rritje të rasteve me grip në këtë qytet javët e fundit. Në një prononcim për mediat, Bejko tha se 40-50 persona me grip marrin shërbim në një ditë në spitalin e Korçës.

Ndërkohë në Pediatrinë e qytetit, numri i fëmjëve që paraqiten për t'u vizituar shkon në 70 në një ditë.

"Në 2-3 javët e fundit është vënë re një shtim i rasteve të të sëmurëve me grip, shkon në 40-50 vizita në ditë që marrin shërbim pranë urgjencës sonë. Një pjesë kalojnë me mjekim laborator në shtëpi, dhe varet në historinë e sëmundjes që ata paraqesin. Një pjesë e vogël e tyre qëndrojnë te ne për disa orë, dhe fillojnë ekzaminimet e mëtejshme nëse ne dyshojmë për diçka. Dhe një pjesë e vogël e tyre që shtrohen në spital në varësi të sëmundjeve që kanë dhe me temperaturën e cila nuk dominohet, më konkretisht pacientët që vuajnë nga bronkopneumonia, ose pneumoni, si dhe rastet e të sëmurëve kronikë të cilët janë dhe më problematikët që në rastet e gripit kur mbivendoset një gjendje me temperaturë, gjendja e tyre agravohet dhe shtrohen në spital, ose në pavionin infektiv ose në pavione të tjera sipas patologjisë përkatëse ku ata shprehin simptomat më të rënda të sëmundjes", u shpreh ajo.

Mjekja sqaroi më tej se të gjitha rastet që paraqiten në urgjencë u bëhet testi COVID, të cilat janë raste më të lehta.

"Pjesa më e madhe janë e gripit që po kalon ndërkohë, edhe rastet me COVID janë më të lehta. Testi COVID u bëhet në pavion edhe pacientëve të shtruar. Gripi është një sëmundje që duhet vlerësuar. E para duke marrë një anamnezë të hollësishme të të sëmurit për çdo rast që paraqitet sepse çdo rast ka specifikat e veta. Fillon me temperaturë, dhimbje kyçesh, dhimbje koke, mesi, të vjella, ka pasur raste edhe me diarre. Ka raste me kollë, dhimbje fyti, vështirësi në gëlltitje", u shpreh ajo./CNA